«Ա1+». «Սասնա ծռեր» խմբի գործով անցնող երկու անձինք՝ Մանվել Աթոյանը եւ Արթուր Սողոմոնյանը դեմ են համաներման կիրառմանը։ Այս մասին այսօր նրանք հայտարարեցին դատական նիստի ժամանակ։ Երեւան քաղաքի ընդհանուր իրավասության դատարանում ընթացող դատական նիստի ժամանակ դատավոր Արտուշ Գաբրիելյանը գործով անցնող բոլոր անձանցից հետաքրքրվեց, արդյո՞ք դեմ չեն համաներմանը։ Գործով անցնող 11 անձանցից միայն երկուսն էին դեմ։
«Սասնա ծռեր»-ին օժանդակելու մեջ մեղադրվող Կարո Եղնուկյանը նշեց, որ համաներման տեքստը օրինականության տեսակետից սխալ է, քանի որ, եթե տուժողներից մեկն առարկում է, ապա չի կարող կիրառվել։ Այնուհետեւ ավելացրեց․ «Համաներումը հանցագործների համար է։ Ապացուցված չէ, մենք հանցագործություն կատարել ենք, թե՝ ոչ։ Իսկ մեկ անձը չի կարող առարկել պետականության որոշման դեմ»,- անդրադառնալով համաներման տեքստին՝ ասաց Կարո Եղնուկյանը։
Ըստ նրա՝ «Համաներման մասին» օրենքը պետության որոշումն է։ «Ես, լինելով պետականամետ մարդ, որոշմանը դեմ չեմ գնա»,- ավելացրեց Կարո Եղնուկյանը։
Սակայն միայն նրանց կարծիքը հարցնելով համաներումը չի կարող կիրառվել, պետք է ճշտել պատանդառված եւ ֆիզիկական վնաս կրած անձանց կարծիքը։ Եթե տուժողները առարկեն, համաներումը չի կիրառվի։
«Սասնա ծռեր»-ից Աշոտ Պետրոսյանն էլ ավելացրեց, որ իրենք ապստամբներ են եւ հանցավոր ռեժիմի դեմ են առարկել․ «Ապստամբության իրավունքը հաստատվելու է եւ շուտով կարդարացվեն»։
Համաներման վերաբերյալ տուժողների կարծիքը լսելու համար դատական նիստը հետաձգվեց մինչեւ դեկտեմբերի 13-ը։
