Երեկ Արագածոտնի մարզում վարչապետի պաշտոնակատար Նիկոլ Փաշինյանը կոչ արեց առաջիկա խորհրդարանական արտահերթ ընտրություններին զերծ մնալ ընտրակաշառք տալուց եւ վերցնելուց՝ նշելով, որ ոստիկանությունը եւ այլ իրավապահ մարմինները պետք է ունենան օպերատիվ տեղեկություններ պոտենցիալ կաշառատուների մասին եւ կանխարգելման մակարդակում այդ հարցը պետք է լուծվի:
Այսօր ոստիկանապետ Վալերի Օսիպյանից լրագրողները հետաքրքրվեցին՝ ոստիկանությունը ստացե՞լ է կաշառք բաժանելու մտադրությունների մասին օպերատիվ տեղեկատվություն: Պարոն Օսիպյանն ի պատասխան ասաց. «Մենք գիտենք՝ ովքեր կամ ով կարող է այդ ամենով զբաղվել եւ մենք պահում ենք մեր տեսադաշտում»:
Նրա խոսքով ընտրակաշառք տվողի ու վերցնողի նկատմամբ զիջող ու հանդուրժող չեն լինելու եւ ցանկացած նման դեպք պատժվելու է օրենքով. «Մենք միշտ վերահսկել ու վերահսկում ենք, դրա վառ ապացույցը սեպտեմբերին տեղի ունեցած Երեւանի ավագանու ընտրություններն էին: Եվ վստահեցնում եմ, որ ոստիկանությունն էլ ավելի խիստ է լինելու»: Ըստ ոստիկանապետի, կապ չունի, ընտրակաշառքը գումարայի՞ն տեսքով է լինելու, թե ինչ որ առարկայով, իրով կամ խոստումով:
Լուսինե ԲՈՒԴԱՂՅԱՆ
