Այսօր կառավարության նիստից հետո ոստիկանապետ Վալերի Օսիպյանից լրագրողները հետաքրքրվեցին, արդյոք հանցագործությունների թվի աճը պայմանավորված է համաներմամբ: Ի պատասխան պարոն Օսիպյանն ասաց, որ այսքան կարճ ժամանակահատվածում չէր կարող արտացոլվել այդ գործոնը: Նրա խոսքով, Հայաստանում հանցագործությունների աճ գոյություն ունի, բայց այնպես չէ, որ իրավիճակը մտահոգիչ է: Ըստ նրա, հանցագործությունների թվի աճը պայմանավորված է մի քանի գործոններով. «Առաջինը, ոստիկանության համակարգում իսպառ վերացել է արատավոր երեւույթը՝ հանցագործությունները թաքցնելը: Քաղաքացիների վստահությունը դեպի ոստիկանությունը բարձրացել է: Այո, նախկինում ոստիկանության ծառայողներին չէին հարգում, չէին ընդունում ու չէին սիրում, այսօր ես կասեմ հակառակը: Քաղաքացիները անգամ մի փոքր իրենց հուզող հարցերի հետ կապված անմիջապես դիմում են իրավապահներին: Աճել են տնտեսական հանցագործությունները, սրանով է պայմանավորված: Բայց, եթե դուք ուսումնասիրեք, մի հատ գնահատեք ծանր կամ առանձնապես ծանր հանցագործությունների մասով բարելավումը, սա է գնահատականը»,- ասաց Վալերի Օսիպյանը:
Վալերի Օսիպյանն այն հարցին, թե նախկինում հանցագործությունների թաքցման հրահանգը ով էր տալիս, արդյոք նախկին ոստիկանապետ Վլադիմիր Գասպարյանը տեղյա՞կ էր դրանից, պատասխանեց՝ Վլադիմիր Գասպարյանը միշտ պահանջել է, որպեսզի չթաքցնեն:
«Քաղաքացին գալիս էր հաղորդում տալու, պայմանական ասենք, որ իր բնակարանը թալանել են: Գալիս էր, որպեսզի դա չազդի ցուցանիշների վրա, ոստիկանները համոզում էին քաղաքացիներին, ասում էին՝ գիտեք ինչ կա, լավ կլինի, որ դուք գնաք, մենք գողին անպայման կհայտնաբերենք: Բանավոր գրանցում էին, ոչ պաշտոնական ընթացք էին տալիս այդ ամենին: Այսինքն՝ կա փաստացի դեպք, բայց չգրանցված է, չի երեւում: Ուզո՞ւմ եք ես եկող ամիս ցուցանիշներ ներկայացնեմ ձեզ, դուք ասեք՝ վայ, էս ինչ լավ է աշխատում ոստիկանությունը: Ես ստեմ ձեզ, ստեմ ինձ, ստեմ ամբողջ հանրությանը»,-ասաց Օսիպյանը:
Պարոն Օսիպյանն ասաց, որ համաներմամբ ազատ արձակված մի քաղաքացի կրկին հանցագործություն է կատարել:
Լուսինե ԲՈՒԴԱՂՅԱՆ
