Մեզ զանգահարել են Տավուշի մարզից կաթնամթերք սպառողները, որոնք ասացին, որ օգտվում են «Լոռվա կաթ» ՍՊԸ արտադրած «Կալինինոյի թթվասերից», որը վերջին շրջանում որակի անկում է ունեցել: Սպառողներն ասացին, որ իրենց դժգոհությունը ցանկացել են հայտնել կաթնամթերք արտադրողին, զանգահարել են թթվասերի տարայի վրա գրված 3 հեռախոսահամարներով, սակայն միացել են տարբեր անձանց, ովքեր կապ չունեն այդ գործարանի հետ:
Մենք էլ զանգահարեցինք այդ հեռախոսահամարներով, որոնցից մեկի տերը Մեղրիից կին էր, որը «Լոռվա կաթ» ՍՊԸ-ի հետ ընդհանրապես կապ չուներ: Մյուս համարներն էլ այդ գործարանի հետ կապ չունեին: Մեր հեռախոսազանգին պատասխանեց Գյումրիից մի կին, որն ասաց, թե կաթնամթերք սպառողների այդ հեռախոսահամարներով զանգերը շուրջ 2 տարի իրեն անհանգստացնում են , ինքն այդ կապակցությամբ ոստիկանություն է դիմել:
Համացանցում գտանք « Լոռվա կաթ» ՍՊԸ հեռախոսահամարը, զանգահարեցինք: Տղամարդը, որը ներկայացավ որպես այդ ընկերության տնօրեն, ասաց, որ խնդրին անտեղյակ է: Նրա խոսքերով՝ իրենց արտադրանքը մեծ քանակությամբ, խմբաքանակներով առաքվում է Հայաստանի տարբեր շրջաններ, արտադրանքի որակը չի ընկել:
Նա իրենց կաթնամթերքի վրա պատահական մարդկանց հեռախոսահամարների առկայության վերաբերյալ ասաց, որ առաջիկայում արտադրանքի տարաների նոր խմբաքանակ կպատվիրեն, այդ հեռախոսահամարները նոր տարաների վրա չեն լինի:
Ոսկան ՍԱՐԳՍՅԱՆ
