«Նման հրապարակումներով անտեղյակ պաշտոնյաները պարզապես փորձում են թաքցնել նաեւ իրենց անգործությունը՝ մամուլի համար իբր աղմկահարույց բացահայտումներ ապահովելով»,- Aravot.am-ի հետ զրույցում այսպես որակեց սոցիալական ապահովության պետական ծառայության նախկին ղեկավար, ՀՀԿ խորհրդի անդամ Հովհաննես Սահակյանը՝ անդրադառնալով մամուլի այն հրապարակմանը, որ հանրապետական պաշտոնյան իր նախորդներից Վազգեն Խաչիկյանի ուղին է որդեգրել եւ իր թիմով զբաղվել է պետական միջոցների իբր հափշտակմամբ:
Նկատենք, որ սոցապ նախարարի հրաժարականի դիմում ներկայացրած Մանե Թանդիլյանն էլ արդեն մի քանի օր ֆեյսբուքյան գովազդային տարբերակով շրջանառում է այդ կառույցում հայտնաբերված պետական միջոցների չարաշահումների մասին:
Հովհաննես Սահակյանը հստակեցնում է՝ շրջանառվող 52-53 միլիոն դրամի չարաշահումների բացահայտումները վերաբերում են մինչ իր պաշտոնավարման շրջանին՝ 2014-2016թթ.: Ի դեպ, այդ բացահայտումներն արվել են ֆինանսների նախարարության վերահսկողական ստուգումների արդյունքում:
Ի գիտություն ազգի, բանակի, լավ տնտեսության եւ այլ բաների մասին պարզապես խոսողների՝ Հովհաննես Սահակյանն ասում է, որ Արցախը իր եւ իր թիմի համար նկարվելու եւ PR-ի վայր չի եղել եւ մանրամասնում, որ ինքն իր թիմով Արցախում ներդրել է էլեկտրոնային կենսաթոշակային համակարգը՝ առանց որեւէ մեկ դրամ պարգեւավճարի, որպեսզի հայկական երկրորդ պետությունն էլ հնարավորություն ունենա քայլել 21-րդ դարին հարիր կեցվածքով: Նաեւ հավելում է, որ ինքն ու իր թիմն են Արցախի համապատասխան ծառայությանը 4 միավոր համակարգչային տեխնիկա նվիրաբերել՝ «առանց նկարվելու եւ որեւէ տեղ դրա մասին խոսելու. բայց ստիպում են»: Հովհաննես Սահակյանն ասում է նաեւ, որ Արցախի համար իր թիմի կատարած աշխատանքի ընդամենը մի փոքր հատվածն են սրանք:
Իրեն եւ իր թիմին արատավորող «դիլետանտիստական հրապարակումների» հետեւում կանգնածներին Հովհաննես Սահակյանը հորդորում է նույն հրապարակայնությամբ ներողություն հայցել, այլապես ինքը կգա համոզման, որ «այս ամենը տանում է քաղաքական դաշտ, որտեղ իրենք մերկ են»:
Նելլի ԳՐԻԳՈՐՅԱՆ
