«Պաշտոնավարման ընթացքում վարչապետի պաշտոնակատարը պարբերաբար հանդիպել է ՀՀ քաղաքացիների հետ եւ դրանում ոչ մի արտառոց բան չկա: Այն, ինչ կարող էր անել նա հավաքի ժամանակ, դա քաղաքացիների հետ շփվելն է եւ նրանց հարցերին պատասխանելը: Դա կարող են անել նաեւ ՀՀԿ-ի թեկնածուները»,-ԱԺ-ում լրագրողների հետ զրույցում այսօր անդրադառնալով ՀՀԿ-ի մեղադրանքներին, թե վարչապետի ԺՊ Նիկոլ Փաշինյանն օրերս Գեղարքունիք այցի ժամանակ Ընտրական օրենսգիրք է խախտել եւ չարաշահելով վարչապետի լիազորությունները՝ նախընտրական քարոզչություն իրականացրել, ասաց ԱԺ «Ելք» խմբակցության պատգամավոր, «Իմ քայլը» դաշինքի պատգամավորի թեկնածու Լենա Նազարյանը:
«Ոչ ոք ՀՀԿ-ականներին չի խանգարում գնալ որեւէ մարզ եւ հավաքի միջոցով շփվել քաղաքացիների հետ: Այլ բան է, որ կարծում եմ՝ դա նրանց մոտ չի ստացվի»,-համոզմունք հայտնեց Լենա Նազարյանը:
Ինչ վերաբերում է ՀՀԿ-ական պատգամավոր Արմեն Աշոտյանի մեղադրանքներին, որ Փաշինյանը Գեղարքունիքում վարչական ռեսուրս է չարաշահել, Նազարյանը նկատեց. «Վարչական ռեսուրսի չարաշահման մասին կարելի է խոսել այն դեպքում, երբ մի թեկնածու կարող է անել մի բան, որը չի կարող անել մյուսը: Հիմա ասեք խնդրեմ՝ ո՞ր թեկնածուն չի կարող գնալ մարզ եւ հանդիպել բնակիչների հետ»:
Հիշեցնենք, որ դեկտեմբերի իննին կկայանան արտահերթ ԱԺ ընտրություններ:
https://www.facebook.com/aravot.am/videos/905445512988386/
Լուիզա ՍՈՒՔԻԱՍՅԱՆ
