ՀՀԿ խմբակցության պատգամավոր Արմեն Աշոտյանը կարծում է, որ ՀՀ վարչապետի ԺՊ Նիկոլ Փաշինյանը երեկվա մամուլի ասուլիսի ընթացքում ագրեսիվ էր: «Դա նշանակում է, որ նա նյարդայնացած է, հետեւաբար՝ նեղված: Չգիտեմ՝ ինչո՞ւ: Երեւի երկրի սոցիալ-տնտեսական խնդիրների բեռն է սկսել գիտակցել: Երեւի նրան զեկուցել են, որ ՀՀ շուրջ անվտանգության եւ արտաքին քաղաքական մարտահրավերներ կան: Երեւի զգում է, որ դեկտեմբերի իննից հետո, եթե նա ստանա ձայների 80%, այլեւս չի կարող դիմադրել միջազգային ճնշումներին Արցախի հարցում, որովհետեւ ԱԺ դահլիճում չի ունենա ընդդիմություն, որը կարող է փրկել իր հեղինակությունը եւ Արցախը»,-լրագրողների հետ զրույցում այսօր նման համոզմունք հայտնեց Արմեն Աշոտյանը, ապա կոչ արեց Փաշինյանին հարցնել, թե ինչու է նյարդայնացած:
Արմեն Աշոտյանի գնահատմամբ՝ պաշտոնավարման յոթ ամսում Նիկոլ Փաշինյանն իր ոչ պրոֆեսիոնալ՝ սիրողական քաղաքական թիմով մսխել է ՀՀԿ-ի թողած քաղաքական կապիտալը, եւ դեռ մսխելու բան ունի:
Աշոտյանը հարցադրում արեց՝ եթե Փաշինյանն ապրիլ-մայիսին բազմամարդ ցույցերի ժամանակ՝ Հանրապետության հրապարակ հարթակից հայտարարեր, որ փակելու է նախարարություններ եւ գիտակրթական հիմնադրամներ, որ «խոպանչիներին» հարկելու է, քանի՞ մարդ կորոշեր գնալ նրա հետեւից:
ՀՀԿ-ական պատգամավորը «բուռն երեւակայության արդյունք» է որակում Նիկոլ Փաշինյանի ասուլիսում երեկ հնչած համոզմունքը, թե ՀՀ նոր իշխանությունը վերջին ամիսներին լիարժեք կատարել է ժողովրդի հանդեպ ստանձնած պարտավորությունները. «Հակակոռուպցիոն պայքարից են խոսում…ցույց տվեք մեկ գործ, որով դատավճիռ կա: Ասեմ ավելին…»: Արմեն Աշոտյանը, սակայն, խոսքն ընդհատեց՝ ասելով, որ այն կշարունակի վաղը չէ մյուս օրը, երբ լրագրողներին հերթական զավեշտի մասին կպատմի, իսկ մինչ այդ՝ ձեռքի տակ եղած փաստերն է ամբողջացնելու:
https://www.facebook.com/aravot.am/videos/191219755118326/
Լուիզա ՍՈՒՔԻԱՍՅԱՆ
