«Ցանկացածին կարող են գաղտնալսել». Կոստանյանը ԱԱԾ-ՀՔԾ պետերին գաղտնալսելու առնչությամբ դեռ եզրակացություն չունի

ՀՀ ԱԱԾ եւ ՀՔԾ պետերի հեռախոսազրույցի գաղտնալսման աղմկոտ միջադեպի առնչությամբ վերջերս ստեղծված ԱԺ քննիչ հանձնաժողովի նախագահ, ԱԺ ՀՀԿ խմբակցության պատգամավոր, ՀՀ նախկին գլխավոր դատախազ Գեւորգ Կոստանյանը ցավով է նշում, որ հանձնաժողովում քվորումի ապահովման խնդիր կա, այդ պատճառով նիստ տեղի չի ունենում: «Առնվազն վեց հոգի պետք է ներկա լինեն, բայց հանձնաժողովի տասը անդամ ներգրավված է ընտրական գործընթացում, ուստի նրանց մասնակցությունը նիստին անհնար է»,-խորհրդարանում լրագրողների հետ զրույցում այսօր անդրադառնալով հանձնաժողովի աշխատանքին՝ ասաց Գեւորգ Կոստանյանը:

Նա համոզմունք հայտնեց, որ ԱԱԾ եւ ՀՔԾ պետերի գաղտնալսումն ազգային անվտանգության խնդիր է եւ դրա հեղինակների բացահայտումը քաղաքական նպատակահարմարությամբ չպետք է պայմանավորված լինի. «Վստահ եմ, նոր խորհրդարանում կրկին կստեղծվի քննիչ հանձնաժողով, որպեսզի նման խնդիրների առաջացման հիմքերն ուսումնասիրվեն: Հարցը վերաբերում է նաեւ դատարանների անկախության հանդեպ հնարավոր միջամտության դրսեւորումներին, ուստի նոր ԱԺ-ի քաղաքական ուժերը շահագրգռված են լինելու իմանալ՝ արդյոք կա՞ն դատավորների անկախության հանդեպ միջամտության հիմքեր»:

Ինչ վերաբերում է գաղտնալսման շուրջ նախնական եզրակացությանը, Գեւորգ Կոստանյանը նշեց. «Բավարար չափով տեղեկատվություն եւ փաստեր ձեռք չենք բերել, ուստի աշխատանքները դեռ պետք է շարունակվեին: Միայն կասեմ՝ մտահոգիչ է, որ ԱԱԾ եւ ՀՔԾ պետերին կարող են գաղտնալսել: Նշանակում է, որ ցանկացած մեկին կարող են գաղտնալսել»:

https://www.facebook.com/aravot.am/videos/2301981393180434/

Լուիզա ՍՈՒՔԻԱՍՅԱՆ