«Վերականգնված գումարների մասով այն ցուցանիշները, որոնք ասել եմ սեպտեմբեր ամսին, կարող եմ ասել, որ նույնն են, հիմա էլ այդ ցուցանիշի շեմում ենք»,-այսօր այս մասին լրագրողների հետ հանդիպման ժամանակ ասաց վարչապետի պաշտոնակատար Նիկոլ Փաշինյանն՝ անդրադառնալով հարցին, թե չարաշահումների եւ տարբեր բացահայտումներից հետո, որքան գումար է վերադարձվել պետական բյուջե:
Վարչապետի պաշտոնակատարն ավելացրեց՝ «Սակայն այդ թվից բացի պետք է ասեմ, որ կան քրեական գործեր՝ 64 մլրդ դրամի յուրացումների եւ չարաշահումների մասին։ Արդյոք սա ամբողջն է, ո՛չ, ամբողջը չէ, քանի որ մեր քննչական մարմիններն ունեն որոշակի սահմանափակումներ դրանց մի մասը հրապարակելու հարցում»:
Փաշինյանը նաեւ ասաց, որ կան մարդիկ, որոնց դեպքերով նույնիսկ քննություն չի իրականացվում, ասում են՝ կամավոր բերենք գումարը վերադարձնենք:
Վարչապետի պաշտոնակատարի խոսքերով՝ «Հիշո՞ւմ եք, ձեզ ասում էի՝ պատգամավորի հետ կապված գործ կա եւ պատասխանի ենք սպասում: Այդ պատասխանն եկավ, բայց պարզվում է եկավ ոչ ամբողջ ծավալով: Մի կեսն եկավ, մյուս կեսը դեռ ճանապարհին է: Այս պրոցեսները միշտ չէ, որ մեզանից են կախված»:
Փաշինյանը վստահեցրեց՝ «Այլ երկրներում ունեցվածքներ ունենալու դեպքերով մի շարք տվյալներ ենք ստացել»:
Մանրամասները՝ տեսանյութում
Նելլի ԲԱԲԱՅԱՆ
