Կառավարությունը մտադիր է ծառայողական մեքենաների ու դրանց ծախսի կրճատում իրականացել: Այսօր այս մասին լրագրողների հետ հանդիպման ժամանակ ասաց վարչապետի պաշտոնակատար Նիկոլ Փաշինյանը:
Նա ասաց, որ ծառայողական մեքենաների վարորդներն 90 հազար դրամ աշխատավարձ են ստանում, ու անհասկանալի է, թե այսքան աշխատավարձով այդ մարդիկ ինչո՞ւ են երկար տարիներ աշխատել:
Հիմա, ինչպես Փաշինյանը վստահեցրեց՝ լուրջ կրճատումների են գնում ծառայողական մեքենաների բենզինի ծախսի եւ ընդհանրապես այդ մեքենաների ծախսի առումով:
«1 միլիարդ դրամ ծախս է ծառայողական ավտոմեքենաները: Ու այդ ծառայողական մեքենաները հիմնականում նախարարության դիմաց կանգնած են՝ արեւի տակ: Մենք 1 միլիարդ դրամ վճարում ենք, որպեսզի այդ մեքենաներն արեւի տակ մաշվեն»,-ասաց Փաշինյանը:
Փաշինյանը ներկայացրեց, թե ինչ են մտադիր անել, որպեսզի եւ վարորդները գոհ լինեն, եւ բյուջեն խնայեն.«Հիմա մենք ասում ենք՝ հարգելի վարորդներ, էս մեքենան տալիս ենք ձեզ՝ տարվճարման պայմանով, շուկայականից 20 տոկոս էժան գնով: Եվ մենք պայմանավորվում ենք ասենք «Յանդեքս» տաքսի ծառայության հետ, որ ձեզ ընդունում են աշխատանքի, վերցրեք մեքենաները եւ գնացեք… ինչո՞ւ պետք է վճարենք, որ մի պաշտոնյա առավոտը գա գործի, իրիկունը գնա տուն: Մենք ուզում ենք այդ մեքենաները տանք վարորդներին եւ պայմանավորվում ենք, որ իրենք այդ մեքենաներով կաշխատեն, իրենք ունենում են աշխատանք, բյուջեն անիմաստ ծախսից ազատում ենք»:
Փաշինյանն ասաց, որ պարզ է, կան նախարարություններ, որոնք տրանսպորտի կարիք ունեն. «Շատ լավ, թող լինեն հերթապահ մեքենաներ, կամ հենց նույն տրանսպորտային ծառայություն մատուցող ընկերությունից օգտվեն, պարզ կլինի՝ որ պաշտոնյան ուր գնաց, երբ, որքան: Այսպիսով` բյուջեն ավելորդ ծախսերից ազատում ենք»:
Մանրամասները՝ տեսանյութում
Նելլի ԲԱԲԱՅԱՆ
