Երեւանի ընդհանուր իրավասության դատարանի դատավոր Արմեն Բեկթաշյանն այսօր մերժել է Նորք-Մարաշի «զինված խմբի» ենթադրյալ ղեկավար Արթուր Վարդանյանին երեք միլիոն դրամ գրավի դիմաց կալանքից ազատելու միջնորդությունը: Արթուր Վարդանյանի շահերի պաշտպան, փաստաբան Լեւոն Բաղդասարյանն Aravot.am-ին փոխանցեց, որ դատարանը կրկին չի պատճառաբանել միջնորդությունը մերժելը: Նախկինում եւս Վարդանյանին կալանքից ազատելու միջնորդություններ ներկայացվել են եւ մերժվել:
Լեւոն Բաղդասարյանի գնահատմամբ. «Պատճառն ընտրովի արդարադատությունն է: Նորքի խումբը համաներման տակ չընկավ տարօրինակ կերպով, հիմա էլ մերժում են միջնորդությունը»:
Պաշտպանը հայտնեց, որ առաջիկայում նոր միջնորդություն կներկայացնի եւ շեշտեց, որ Նորքի խմբի բոլոր անդամները վերջին շրջանում ազատ են արձակվել կալանքից, բացի Արթուր Վարդանյանից:
Հիշեցնենք, որ խմբի անդամները մեղադրվում են հանցավոր գործակցություն ձեւավորելու, ապօրինի զենք-զինամթերք պահելու-փոխադրելու, իշխանությունը յուրացնելու նախապատրաստության համար: Մասնավորապես, ըստ քրեական գործի նյութերի, նրանք մտադրվել էին խոցել ՀՀ երրորդ նախագահ Սերժ Սարգսյանի ինքնաթիռը։ Նրանք վնասազերծվել էին 2015թ.-ին՝ Նորք-Մարաշի տներից մեկում:
Լուիզա ՍՈՒՔԻԱՍՅԱՆ
