ՀԱՊԿ գագաթնաժողովի արդյունքում նոր գլխավոր քարտուղարի նշանակման հարցում կա երկու մոտեցում. կամ ռոտացիայի սկզբունքով, կամ դարձյալ Հայաստանին, բայց կազմակերպության անդամներից շատերը կասկածում են երկրորդ տարբերակի արդյունավետության վրա: Այս մասին հայտարարել է ՀԱՊԿ գլխավոր քարտուղարի պաշտոնակատար Վալերի Սեմերիկովը:
«Աստանայում նոյեմբերի 8-ին ՀԱՊԿ անդամ-պետությունների ղեկավարների քննարկումների արդյունքում կա մի քանի մոտեցում, այդ թվում Հավաքական անվտանգության խորհրդի որոշմամբ նախատեսված ռուսերենի այբբենական կարգով ռոտացիայի սկզբունքը: Հենց այդ սկզբունքի մասին էր խոսում Ղազախստանի նախագահը՝ ամփոփելով Աստանայի քննարկումները: Մյուս դիրքորոշումը՝ (Հայաստանինը) մինչև եռամյա ժամկետի ավարտը նշանակել իր ներկայացուցչին, դրա արդյունավետության վերաբերյալ հարցերի տեղիք է տալիս մի շարք երկրների մոտ»,- ասվում է կազմակերպության կայքում հրապարակված մեկնաբանության մեջ:
Սեմերիկովն ասել է, որ հավաքական անվտանգության խորհուրդը կշարունակի հարցի քննարկումը՝ կառուցողական համագործակցության ոգով:
«Ընդ որում, ցանկանում եմ հատուկ ընդգծել, որ որոշումը ցանկացած պարագայում կընդունվի բացառապես ՀԱՊԿ վեց երկրների ձևաչափում՝ կոնսենսուսով՝ հաշվի առնելով բոլոր կողմերի շահերը: Եվ մեծ հույսեր ունեմ, որ ԶԼՄ-ները զսպվածություն կցուցաբերեն իրենց այնպիսի մեկնաբանություններում, որոնք չեն արտացոլում գործընթացի իրականությունը Կազմակերպության գլխավոր քարտուղարի նշանակման հարցում»,- ասվում է մեկնաբանության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
