Ադրբեջանի արտգործնախարարությունն իր դիվանագիտական խողովակներով կտրուկ բողոք է հայտնել ԱՄՆ-ին՝ կապված Լեռնային Ղարաբաղի նախագահ Բակո Սահակյանին այցագիր տրամադրելու հետ: Այս մասին ասվում է Ադրբեջանի ԱԳՆ հաղորդագրության մեջ:
Հաղորդագրության մեջ, մասնավորապես, նշվում է, որ «անօրինական ռեժիմի «ներկայացուցչի»» մուտքը ԱՄՆ հակասում է ԱՄՆ-ի՝ որպես ԵԱՀԿ Մինսկի խմբի համանախագահ երկրի պարտավորություններին և ԱՄՆ-ի պաշտոնական դիրքորոշմանը: Ընդ որում, գերատեսչությունում կարծում են, որ Բակո Սահակյանին այցագիր տրամադրելը «լուրջ հարցեր է առաջացնում կապված ԱՄՆ վիզաների տրամադրման գործընթացի հետ»:
«Զարմանալին այն է, որ վիզաների տրամադրման գործընթացի ազատականացումը ԱՄՆ-ը չի կիրառում հետխորհրդային տարածության այլ անօրինական կառույցների նկատմամբ, այլ միայն Ադրբեջանի օկուպացված տարածքների վրա ստեղծված անօրինական կառույցի «ղեկավարների» նկատմամբ,- ասվում է հաղորդագրության մեջ:- Անջատողական ռեժիմի խրախուսմանն ուղղված նման քայլերը հարցեր են առաջացնում՝ կապված ԱՄՆ-ի և Ադրբեջանի հարաբերությունների անկեղծության հետ»:
Պատրաստեց՝ Վիկտորյա ԱՆԴՐԵԱՍՅԱՆԸ
