«Գյուղատնտեսությունը բիզնես է, որը կարող է կարճ ժամանակահատվածում բերել հաջողություններ, եթե կա գիտելիք, կամք ու աշխատանք»,- սա ՀՀ գյուղատնտեսության նախարարի պաշտոնակատար Գեղամ Գեւորգյանի մոտեցումն է: Նախարարի պաշտոնակատարն այսօր LoftYerevan-ում իր մոտեցումները կիսեց ոլորտի ներկայացուցիչների հետ` «Գյուղատնտեսություն, որը բիզնես է» թեմայով հանդիպում-քննարկման ժամանակ: Նախարարը կարեւորում է գյուղատնտեսության ոլորտում նոր տեխնոլոգիաների կիրառումը. «Մեր խնդիրներից է երիտասարդ փորձառու ֆերմերների քիչ լինելը: Պետք է խրախուսենք երիտասարդ ֆերմերին, մեր գյուղատնտեսության ապագան կրթված երիտասարդները, ֆերմերներն են»:
Նախարարի պաշտոնակատարը նկատեց`գյուղատնտեսությունը ռիսկային ոլորտ է, բնական աղետները խնդիր են դառնում հաճախ: Ասաց, որ 2019 թվականից գյուղացիական ապահովագրության համակարգի փորձնական ծրագիր են ներդնելու:
Նախարարի պաշտոնակատարին շատ հարցեր տրվեցին`ոռոգման ջրի հետ կապված: «Ջրի հարցը ամենացավոտ հարցերից է, մենք հիմա ունենք միջգերատեսչական համագործակցության լայն շեմ. եթե ոռոգման համակարգեր ենք կառուցում, ներդնում ենք ջրամբարների ունենալը, հաշվարկները հենց սկզբից պետք է անել»:
Գործարար Արտյոմ Թադեւոսյանը հինգ տարի առաջ է Հայաստան վերադարձել եւ չրի արտադրությամբ է զբաղվում: Նա դժգոհեց կառավարություն-ՓՄՁ ոլորտի ներկայացուցիչներ երկխոսության բացակայությունից: Նախարարը համամիտ է, իրենք խոշորների հետ են աշխատում, իսկ խոշորների եւ ՓՄՁ-ների խնդիրներն այլ են:
Մանրամասները`տեսանյութում
Ֆերմերներից մեկն էլ անդրադարձավ նախարարի բարձրացրած այն հարցին, թե ինչո՞ւ կաթիլային ոռոգման համակարգի ներդրման սուբսիդավորման ծրագիրը չի «աշխատել»: Ըստ գործարարի, նախ `ջրի իրական արժեքը այլ է, նաեւ պարբերական ջրամատակարարման հարց, աշխատողների խնդիր կա, քանի որ մարդիկ չեն ցանկանում մի քանի ամսով գրանցված աշխատանքի անցնելով «Փարոսից» զրկվել:
Նելլի ԳՐԻԳՈՐՅԱՆ
