«ՀՀ-ն դրական քայլեր ձեռնարկել է ժողովրդավարական գործընթացներում, իսկ այս պահին կարեւոր խաչմերուկում է եւ վճռական որոշումներ պետք է կայացնի: Ընտրությունները մեծ հնարավորություն են՝ «չափելու» երկրի պատրաստակամությունը՝ իրական ժողովրդավարության ճանապարհին»,-ՄԱԿ-ի հայաստանյան գրասենյակում այսօր լրագրողների հետ հանդիպմանն անդրադառնալով դեկտեմբերի իննին սպասվելիք ՀՀ ԱԺ արտահերթ խորհրդարանական ընտրություններին, ասաց ՄԱԿ-ի խաղաղ հավաքների և միություններ կազմելու իրավունքի հարցերով հատուկ զեկուցող Կլեման Նյալեցոսի Վուլեն, որը վերջերս ՀՀ կառավարության հրավերով եկել էր Հայաստան՝ մարդու իրավունքների պաշտպանության ոլորտում զեկույց պատրաստելու համար: Զեկույցի ամբողջական տարբերակը կհրապարակվի առաջիկայում:
Կլեման Նյալեցոսի Վուլեի գնահատմամբ՝ հայ ժողովրդի ակնկալիքները չափազանց բարձր են այն համոզմունքի շուրջ, որ այս ընտրությունները լինելու են երկրի պատմության մեջ լավագույնը. «Այսօր ժողովրդավարությունը մեծապես կախված է նրանից, թե բազմակարծությունը որքանով է պահպանվում՝ իրավունքի գերակայության հիմքով: Վստահ եմ, որ հետհեղափոխական այս կարեւոր ժամանակաշրջանում ՀՀ իշխանությունները պատրաստակամ են քաղհասարակության հետ գործակցել, որպեսզի խնդիրների լուծումները գտնվեն համակարգային կերպով»:
Ըստ Վուլեի. «ՀՀ իշխանությունը պահպանում է հեղափոխության արժեքը, որը պետք է հասնի իր վերջնանպատակին: ՀՀ-ն գտնվում է իրավունքի գերակայության եւ ժողովրդավարացման ճանապարհին:
Տարեսկզբին հասարակությունը որոշեց խաղաղ ցույցեր անել, որոնք հայտնի են «թավշյա հեղափոխություն» անվամբ: Այդ խաղաղ անցումը պետք է ընկալվի որպես նոր հույս եւ հնարավորություն: Մյուս կողմից, քաղաքական առաջնորդների համար կարեւոր է օգտվել առիթից եւ ամրապնդել իրավունքի գերակայությունը եւ մարդու իրավունքների պաշտպանությունը»: ՄԱԿ-ի հատուկ զեկուցողը նաեւ տեղեկացրեց, որ այցելել է Լոռիի, Շիրակի եւ Վայոց Ձորի մարզեր, հանդիպել մարզպետների եւ քաղաքացիական հասարակության ներկայացուցիչների հետ. «Կառավարման մակարդակում փոփոխություններ կան, թափանցիկության ամրապնդման համար միջոցներ են ձեռնարկվել: Ուրախ էի տեսնել, որ հեղափոխությունը փոփոխություններ է բերել մարզերում»:
Լուիզա ՍՈՒՔԻԱՍՅԱՆ
