Ներկայումս հայաստանյան դատարաններում քննվող որոշ գործերի համատեքստում դեռ հարցականի տակ է դատական համակարգի թափանցիկությունը եւ անկողմնակալությունը: Այս մասին այսօր ՄԱԿ-ի հայաստանյան գրասենյակում լրագրողների հետ հանդիպմանն ասաց ՄԱԿ-ի խաղաղ հավաքների և միություններ կազմելու իրավունքի հարցերով հատուկ զեկուցող Կլեման Նյալեցոսի Վուլեն:
Նա շեշտեց, որ դեռեւս 2010թ.-ից անավարտ գործեր կան. «Թեեւ դատախազությունում ինձ վստահեցրին, որ որոշ գործեր վերաբացվել են, բայց ես հետեւյալը գիտեմ. ՀՀ քաղաքացիները դեռ հարցեր են բարձրաձայնում այն մասին, որ իրենց գործերով հստակ արդյունքներ չկան»:
Կլեման Նյալեցոսի Վուլեն ՀՀ կառավարությանը եւ դատական համակարգին կոչ արեց քայլեր ձեռնարկել, որպեսզի նոր Հայաստանում արդարադատության համակարգը լինի անկախ, իսկ դատական համակարգի գործունեության շնորհիվ մարդիկ վստահեն դատական իշխանությանը. «Դա ժողովրդավարության երաշխիքներից է: Դատական համակարգը պետք է անկողմնակալ եւ անկախ լինի»:
Լուիզա ՍՈՒՔԻԱՍՅԱՆ
