«Սարի թաղի» գործով հերթական դատական նիստում այսօր դատավոր Աննա Դանիբեկյանի որոշմամբ մեղադրյալներ Սարգիս Արաբաջյանի եւ Կարեն Վանոյանի հանդեպ կիրառվեց համաներման ակտը: Այս գործով տուժող յոթ ոստիկանները գրություն էին ուղարկել դատարանին առ այն, որ իրենք չեն առարկում համաներման դեմ: Եթե նրանք առարկեին, համաներում չէր կիրառվի:
Սարի թաղի բնակիչներ Արաբաջյանը եւ Վանոյանը մեղադրվում էին 2016թ. ՊՊԾ գնդի գրավումից հետո, մասնավորապես՝ հուլիսի 19-ին, Սարի թաղում միջադեպի ժամանակ ոստիկանների հանդեպ բռնություն գործադրելու համար. օրեր շարունակ Սարի թաղում ջուր, տրանսպորտ ու գազ չի եղել, դեպի Խորենացի փողոց՝ ՊՊԾ գնդի կողմ տանող ճանապարհն էլ փակ է եղել (տարածքը գրավված էր «Սասնա ծռեր» զինված խմբի կողմից), ինչի պատճառով բնակիչները դուրս էին եկել փողոց՝ բողոքելու:
Այսպիսով, Արաբաջյանի եւ Վանոյանի հանդեպ քրեական հետապնդումը դադարեցվեց: Նիստի ընթացքում Ճանապարհային ոստիկանությունից նրանց դեմ 150 000 դրամի չափով գույքային պահանջի մասին քաղաքացիական հայց էր ներկայացվել, ինչպես վերջերս՝ «Սարի թաղի» մեկ այլ գործով, որը, սակայն, դատարանը թողեց առանց քննության:
Արաբաջյանի եւ Կարեն Վանոյանի շահերի պաշտպան, փաստաբան Լիպարիտ Սիմոնյանը ՃՈ քաղհայցի դեմ առարկեց. «Նախ, հստակ չէ՝ ո՞ւմ դեմ է ուղղվել հայցը եւ Սարի թաղի բնակիչներից ո՞վ է անմիջականորեն վնաս պատճառել ՃՈ մեքենային: Բացի այդ, գործով էլի մեղադրյալներ կան, բայց հիմա երկուսից ուզում են այդքան գումար: Հետո մյուսներից էլ կուզեն եւ կդառնա, ասենք, 600 000 դրամ»:
Հավելենք, որ դատավոր Աննա Դանիբեկյանի վարույթում Սարի թաղցիներին առնչվող դեռ երկու գործ է քննվում: Երկուսում էլ պետք է քննարկվի համաներման ակտի կիրառումը:
Լուիզա ՍՈՒՔԻԱՍՅԱՆ
