«Մարդիկ հպարտ են վերջին իրադարձություններով. ՀՀ-ում այս տարի տեղի ունեցած խաղաղ հավաքները բերեցին երկար սպասված փոփոխությունների»,-ՄԱԿ-ի հայաստանյան գրասենյակում այսօր լրագրողների հետ հանդիպմանն անդրադառնալով «Իմ քայլը» ժողովրդական շարժմանը, ասաց ՄԱԿ-ի խաղաղ հավաքների և միություններ կազմելու իրավունքի հարցերով հատուկ զեկուցող Կլեման Նյալեցոսի Վուլեն: Նա ընդգծեց, որ ՀՀ սահմանադրությունը երաշխավորում է խաղաղ հավաքներ անելու իրավունքը. «Այդպիսի հավաքներ ՀՀ-ում հնարավոր է իրականացնել պարզապես ծանուցմամբ: Իսկ ինքնաբուխ հավաքների համար իրազեկումն անհրաժեշտը չէ, եթե մասնակիցների թիվը չի գերազանցում հարյուր հոգին: Ցանկացած դեպքում, ոստիկանությունը պարտավոր է ապահովել հավաքի մասնակիցների անվտանգությունը, քանի դեռ հավաքը խաղաղ է»:
ՄԱԿ-ի պաշտոնյան ներկայիս ժամանակահատվածը ՀՀ-ի համար անցումային շրջան է համարում եւ շեշտում, որ ժողովրդական շարժման մեկնարկից ի վեր խաղաղ հավաքների սահմանափակում չի եղել. «Իսկ նախկինում եղել են որոշ մտահոգություններ: Շեշտեմ նաեւ, որ շատ դեպքերում ոստիկանության պրակտիկան չի համապատասխանում օրենսդրությանը: Խոսքը նախկին պրակտիկայի մասին է՝ մինչեւ անցումային փուլը: Նախկինում եղել են միջադեպեր, երբ ոստիկանությունն անհամաչափ ուժ է կիրառել՝ ցուցարարներին բերման է ենթարկել եւ պահել ավելի երկար, քան նախատեսված է օրենքով»:
Ըստ Կլեման Նյալեցոսի Վուլեի՝ ՀՀ ոստիկանությունը պետք է այնպես անի, որ իր գործելաոճը համապատասխանի օրենքին. «Կարծում եմ՝ դեկտեմբերին սպասվող խորհրդարանական ընտրություններից հետո պետք է ուշադրություն դարձնել ոստիկանության աշխատողների կարողությունների բարձրացմանը»:
Լուիզա ՍՈՒՔԻԱՍՅԱՆ
