«Այն, ինչ ներկայումս խոսվում է տարբեր անձանց կողմից՝ «տարածքներ՝ խաղաղության դիմաց» ձեւակերպմամբ, մեզ համար անընդունելի է: Արցախյան հիմնահարցի լուծման հիմքը պատճառների վերացումն է, իսկ այդ նպատակով նախ Ադրբեջանը պետք է ճանաչի ԼՂՀ ժողովրդի ինքնորոշման իրավունքի ամբողջական իրացումը: Այսինքն, ճանաչի, որ ԼՂՀ ժողովուրդն է հանրաքվեի միջոցով որոշելու իր ճակատագիրը»,-ԱԺ-ում լրագրողների հետ զրույցում այսօր հայտարարեց ՀՀԿ խոսնակ Էդուարդ Շարմազանովը:
Նրա խոսքով՝ եթե ԵԱՀԿ Միսնկի խմբի համանախագահները կամ ԱՄՆ բարձրաստիճան պաշտոնյանները թեկուզ անուղղակի ակնարկում են «տարածքներ՝ խաղաղության դիմաց» մոտեցման մասին, պետք է հաշվի առնել, որ հայկական կողմի համար դա ընդունելի չէ: Ինչ վերաբերում է Արցախի անվտանգության խորհրդի քարտուղար Վիտալի Բալասանյանի հայտարարությանը, թե՝ ՀՀ-ի եւ Արցախի միջեւ առաջիկայում ռազմաքաղաքական դաշինք է կնքվելու, Շարմազանովը հիշեցրեց. «Նման մտադրություն եղել է դեռեւս ապրիլյան ռազմական գործողություններից հետո: Երբ գա ժամանակը, դրա մասին կխոսենք: Մենք լուրջ մտահոգություններ եւ մարտահրավերներ ենք տեսնում՝ ոչ միայն ազգային անվտանգության, այլեւ Արցախի հարցում»:
Շարմազանովը վստահեցրեց, որ դեկտեմբերի իննին կայանալիք արտահերթ խորհրդարանական ընտրություններին ՀՀԿ-ն մասնակցելու է Արցախի հարցում ունեցած առաջնային խնդրով՝ միակողմանի զիջումների չգնալ Արցախի հարցում. «Մենք նպատակ չունենք ասել, թե ներկայիս իշխանությունն ազգադավ է եւ ուզում է զիջումների գնալ: Ոչ, մենք էժանագին պոպուլիզմով չենք զբաղվում, այլ պարզապես ասում ենք, որ կա մարտահրավեր: Իսկ ՀՀԿ-ն անելու է ամեն ինչ՝ իր փորձով, կապերով, որպեսզի թույլ չտանք Արցախի հարցում անցանկալի զարգացում»:
https://www.facebook.com/aravot.am/videos/2178154689102540/
Լուիզա ՍՈՒՔԻԱՍՅԱՆ
