«Մենք հաջորդ ընտրությունները կունենանք 2023 թվականին»,- այսօր կառավարության նիստից հետո լրագրողների հետ ճեպազրույցում ասաց կրթության եւ գիտության նախարարի պաշտոնակատար, ՔՊ վարչության անդամ Արայիկ Հարությունյանը՝ անդրադառնալով Aravot.am-ի այն հարցին, որ ՀՀԿ-ական Սամվել Նիկոյանը հայտարարել է՝ «…համոզված եմ, որ այս խորհրդարանը կարճ կյանք է ունենալու՝ 1-2 տարի։ Բանն այն է, որ ժողովուրդը սովորեց, թե ինչպես կարելի է արտահերթ ընտրություններ անցկացնել… Պառլամենտը սովորեց, թե ինչպես է հնարավոր հակասահմանադրական ճանապարհով պառլամենտական ընտրություններ անցկացնել»: Այս առնչությամբ Հարությունյանը նաեւ ասաց. «Որեւէ գործողություն մինչեւ հիմա հակասահմանադրական չի եղել, դա շատ հստակ ֆիքսվել է, բոլոր մեր գործողությունները եղել են Սահմանադրության շրջանակներում»:
Դիտարկմանը՝ ըստ մամուլի հրապարակումների, Հարությունյանը հավակնում է ԱԺ նախագահի պաշտոնին, եւ որ այս պաշտոնի համար ՔՊ-ում «պայքար է», Հարությունյանը պատասխանեց. «Ընտրությունների արդյունքներն ու թիմային քննարկումները ցույց կտան, թե ով է իրական հավակնորդը եւ ով կհավակնի այդ պաշտոնին»: Ճշտող հարցին՝ ինքը դեմ չի՞ լինի այդ պաշտոնին, Հարությունյանը պատասխանեց՝ «Քաղաքական գործիչը, որը գործընթացներին մասնակցում է, իր համար նման սահմանափակումներ չկան, յուրաքանչյուրը ձգտում է առավելագույնի»:
Լրագրողների դիտակմանը, որ ՀՀԿ-ականները կոչ են անում՝ պետք չէ մեծամտանալ, Արայիկ Հարությունյանը պատասխանեց. «Մենք մեծամիտ չենք, մասնավորապես, ես 2 օր առաջ հարցազրույցների ժամանակ նշել եմ, որ յուրաքանչյուրին մրցակից ենք համարում»:
Արայիկ Հարությունյանն անդրադառնալով Արմեն Աշոտյանի՝ «Եթե ձեր ցուցակի 1-ին տեղում լինի Նիկոլի ուսապարկը, 2-րդ տեղում՝ Նիկոլի կեպկեն, 3-րդ տեղում՝ Նիկոլի հազը, դուք, մեկ է, 80 տոկոս ձայն եք հավաքելու», հայտարարությանը, ասաց. «Ես ցավում եմ, որ Արմեն Աշոտյանը իրեն մրցակից է համարում այդ կոմպոնենտը»:
Դիտարկմանը, որ ՀՀԿ-ն նկատի ունի ՔՊ-ում միակ հեղինակությունը Փաշինյանն է եւ ընտրությունների արդյունքներն էլ նրա անվամբ են պայմանավորում, Հարությունյանն ասաց. «Կառավարությունը թիմային աշխատանք է: Ուսումնասիրեք անցած տարվա ռեյտինգային ընտրությունները եւ կտեսնեք, թե Նիկոլ Փաշինյանի թիմակիցներն այդ տարածքներում եւ այդ սահմանափակումների պարագայում որքան շատ ձայներ են հավաքել»:
Մանրամասն՝ տեսանյութում
Նելլի ԲԱԲԱՅԱՆ
