Տիգրան Ուրիխանյանն այսօր ԱԺ-ում ներկայացրեց «Կրթության մասին» օրենքում փոփոխությունների նախագիծ, որով նախատեսվում է, որ բուհերում սովորող ուսանողները, որոնք սովորում են վճարովի հիմունքով, այլեւս դուրս չմնան բուհերից՝ գումարը անհրաժեշտ պահին չվճարելու հիմքով:
Առաջարկվում է, որ ուսանողները հնարավորություն ունենան գումարները վճարել ամսական տարաժամկետմամբ, ոչ թե միանվագ ու չլինի պարտադրանք՝ «մինչեւ գումարը չբերես՝ դասի չենք թողնելու»: Ուրիխանյանն ասաց, որ եթե վաղը քվեարկությանը պատգամավորները չգան նիստին ու քվորում չլինի, այդ բացակա պատգամավորների անունները դաջվելու են առնվազն ուսանողների հիշողության մեջ:
ԱԺ տնտեսական հարցերի հանձնաժողովի նախագահ Խոսրով Հարությունյանը հարցրեց՝ եթե ուսանողին տրվի տարաժամկետ վճարելու հնարավորություն, արդյո՞ք դա չի առաջացնի բուհի ֆինանսական ծախսերի պրոբլեմ, այնպես չստացվի, որ բուհը գնա վարկ վերցնի ստիպված, տոկոսներ մարի, որ կարողանա իր ծախսերի անընդհատությունն ապահովել:
Ուրիխանյանը պատասխանեց, որ այդ հարցը քննարկվել է բազմաթիվ բուհերի ղեկավարների հետ. «Բուհերը հիմնականում իրենց ֆինանսական հոգսերը հոգում են ամսական կտրվածքով, դա լինի աշխատավարձ, կոմունալ վճարում եւ այլն: Գումարի չափը չի փոխվում: Կարող են ուսանողի նկատմամբ սանկցիա կիրառել, եթե նա չի կատարում իր ամսական պարտավորությունը»:
Խոսրով Հարությունյանն ասաց, որ ժամանակին հիփոթեքային վարկերի ժամանակ հնարավորություն տվեցին եկամտահարկի գումարով փակել վարկի տոկոսները, արդյոք հնարավոր չի՞ ուսանողական վճարի մեջ այդ հնարավորությունն ուսումնասիրել: Ուրիխանյանը պատասխանեց, որ ինքն էլ է օգտվել այդ հնարավորությունից վարկով տուն կառուցելու եւ եկամտահարկի վերադարձից օգտվելու, դա հիանալի ծրագիր էր եւ եթե պետությունը ֆինանսական միջոցներ կգտնի դա անել նաեւ ուսանողների դեպքում, լավ կլինի:
Հռիփսիմե ՋԵԲԵՋՅԱՆ
