Այսօր ինքնալուծարված ԱԺ նիստը սկսեց ուշացումով: Այս քառօրյայի բոլոր նիստերն առհասարակ մի փոքր ուշացումով են սկսվում, մինչեւ պատգամավորները գան ու քվորում լինի: Իսկ այսօր մոտ 20 րոպե ստիպված սպասեցին: Առավոտյան պետք է լինեին կարեւոր քվեարկություններ, այդ թվում՝ 2019-ի պետբյուջեի նախագծի հաստատումը: Բայց քանի որ պատգամավորների մի մասը եկել, կոճակը սեղմել ու գնացել էր, քվեարկության ժամանակ նրանց կոճակը սեղմող չէր լինի, ուստի ԱԺ նախագահ Արա Բաբլոյանը ստիպված հետաձգեց քվեարկությունը, բայց բորբոքվեց. «Եթե դուք ուզում եք պետական կառավարման համակարգի մարմինների մասին օրենքի նախագիծը տապալեք, եթե դուք ուզում եք «Ընդերքի մասին» օրենքի փոփոխությունները տապալեք…կարեւոր հարցեր են, մի քիչ լուրջ մոտենանք հարցին: Ինձ համար զարմանալի է, որ մարդիկ գալիս են, ուղղակի ներկա են ստանում ու գնում են: Մի քիչ պարտաճանաչություն պետք է լինի, էլի»:
Ի դեպ, դեկտեմբերի 3-ի հերթական քառօրյա նիստ է նշանակված, բայց քանի որ դեկտեմբերի 9-ին ընտրություններ են եւ պատգամավորների մի զգալի մասը չի գա նիստին, ակնհայտորեն քվորում չեն ապահովի, Արա Բաբլոյանը ԱԺ խմբակցություններին առաջարկեց մի ելք մտածեն, թե ինչպես կարող են շրջանցել օրենքը, որ այդքան պատգամավոր այսպես ասած չտուգանվի: Ըստ «ԱԺ կանոնակարգ» օրենքի, պատգամավորի ամեն բացակայության համար նրանց աշխատավարձից պահում է արվում մոտ 30 հազար դրամ: Հնարավոր է ԱԺ հայտարարությամբ չեղյալ համարվի այդ քառօրյա նիստը:
Հռիփսիմե ՋԵԲԵՋՅԱՆ
