Խորհրդարանում քննարկվում էր ՀՀԿ պատգամավոր Սամվել Ֆարմանյանի նախագիծը, որով արգելվելու է բուքմեյքերական ընկերությունների՝ տոտոների, վիվարոների գործունեությունը: Խոսքը «Շահումով խաղերի, վիճակախաղերի մասին» օրենքում փոփոխություններ կատարելու նախագծի մասին է: Նույնաբովանդակ մի նախագիծ ներկայացրել էր նաեւ Ալեն Սիմոնյանն ու նախագծին համահեղինակ են դարձել ՀՅԴ-ից Սպարտակ Սեյրանյանն ու «Ծառուկյան» դաշինքից Նաիրա Զոհրաբյանը, սակայն այդ նախագծին ԱԺ տնտեսական հարցերի հանձնաժողովի նիստում ՀՀԿ-ականները դեմ քվեարկեցին ու բացասական եզրակացություն տվեցին, որից հետո հեղինակները նախագիծը հանեցին շրջանառությունից:
Հիշեցնենք, որ ի տարբերություն Ալեն Սիմոնյանի նախագծի, Սամվել Ֆարմանյանն առաջարկում է արգելել վիվարոների գրասենյակների գործունեությունը ինչպես ֆիզիկապես, այնպես էլ՝ վիրտուալ դաշտում:
Այսօր նիստում Նաիրա Զոհրաբյանն ասաց, որ «Ծառուկյան» խմբակցությունը դեմ է քվեարկելու Ֆարմանյանի նախագծին: Ըստ նրա, իրենց նախագիծն ավելի գրագետ էր, քան Ֆարմանյանինը, որքան էլ վերջինս երեկ շատ էմոցիոնալ փորձում էր ներկայացնել այն. «Մենք ողջամիտ մտահոգություններ ունենք, որ նախագիծը, որը ներկայացված է ձեր կողմից, ուղղակիորեն չի պատկերացնում այն քաոսը, որը առաջանալու է նախագծի ընդունումից հետո: Դա բերելու է բացարձակ բեսպրեդելի այն ոլորտում, որը դուք իրավացիորեն փորձում եք կարգավորել: Ես հասկանում եմ, որ հանրային շահի անվան տակ, ասելով, որ հանրությունն ուզում է, հանրությունը պահանջում է, էմոցիոնալ դաշտ է ստեղծվում, բայց այս նախագիծը չի կարգավորելու դաշտը: Չպետք է ինքնալուծարված ԱԺ-ի վերջին շնչում բերել մի նախագիծ, որը գրագետ չէ, բազմաթիվ հարցեր է առաջացնում եւ չի լուծելու այն կարեւոր, օբյեկտիվ խնդիրը, որը դրել եք ձեր առջեւ»:
Նա առաջարկեց շրջանառությունից հանել նախագիծը, ստեղծել աշխատանքային խումբ, որ ապագա խորհրդարանի պատգամավորները, բոլոր ռիսկերը հաշվարկելով, կընդունի նոր նախագիծ:
Նաիրա Զոհրաբյանը հիշեցրեց. «Ի դեպ, ձեր իշխանությունը այս երկար ու ձիգ տարիներին ուներ բոլոր անհրաժեշտ գործիքները, ուներ ժամանակ՝ ոլորտը կարգավորելու: Հիմա ես ունեմ օբյեկտիվ հիմք մտածելու, թե ինչու եք դուք հենց հիմա բերել այս նախագիծը, որը ոչ թե լուծում է խնդիրը, այլ առաջացնում է նորանոր ռիսկեր»:
Ֆինանսների փոխնախարար Կարեն Թամազյանը նույնպես համակարծիք էր տիկին Զոհրաբյանի հետ: Ըստ նրա, տոտալիզատորների համար բարձիթողի վիճակ է ստեղծվելու. «Ես կոչ եմ անում այս նախագծին քվեարկել դեմ այն մարդկանց, ովքեր ուզում են, որ բնագավառը լինի կարգավորված, այդ թվում նաեւ՝ պարոն Ֆարմանյանին»:
Հռիփսիմե ՋԵԲԵՋՅԱՆ
