Դպրոցական տարիներ… Հենց այդ հիանալի շրջանում է ձեւավորվում երիտասարդ մարդկանց աշխարհայացքը, աշխատանքի, շրջապատի նկատմամբ վերաբերմունքը:
Գիտելիքների հիմքը կազմող մյուս առարկաների հետ մեկտեղ աշակերտները զբաղվում են ֆիզկուլտուրայով, որը կոչված է ամրապնդելու պատանիների առողջությունը, կոփելու նրանց կամքն ու խառնվածքը: Երեւանի հ.110 հիմնական դպրոցը կարող է հպարտանալ իր սաներով:
Մանկավարժական կոլեկտիվը տնօրենի գլխավորությամբ (տնօրեն՝ Ա. Ավետիսյան) շատ ջանքեր է գործադրում, որ դպրոցն ավարտած ամեն մի աշակերտ ստանա անհրաժեշտ գիտելիքներ, պատրաստ լինի հանրօգուտ աշխատանքի:
Ֆիզկուլտուրան մարդու մեջ դաստիարակում է արժեքավոր շատ հատկություններ, որոնք կարեւոր դեր են խաղում անհատի ձեւավորման գործում: Նա մշակում է անհրաժեշտ հատկություններ, կոփում է կամքը, զարգացնում բարեկամության, հայրենասիրության, կոլեկտիվիզմի զգացումը, գեղեցկության ըմբռնումը, նպաստում մարդկանց առողջության ամրապնդմանը:
Այդ առարկան պատանիներին անհրաժեշտ է՝ սկսած առաջին դասարանից:
Հենց առաջին քայլերից այն դպրոցականներին սովորեցնում է կարգապահություն, ճշտապահություն, պահանջկոտություն: Երեխաները սկսում են հետեւել իրենց արտաքին տեսքին, աշխատում են չուշանալ պարապմունքներից: Չէ՞ որ երեխայի համար ինչ-որ չափով անհարմար է դահլիճ մտնել այն ժամանակ, երբ ամբողջ դասարանն արդեն շարված է՝ ֆիզկուլտուրայի դասն սկսելու համար: Նրանցից յուրաքանչյուրը ձգտում է լինել ջանասեր: Այսպես, արդեն ուսման առաջին տարում դրվում են այն հիմքերը, որոնք այնքան անհրաժեշտ են մարդուն նրա ամբողջ կյանքի ընթացքում:
Ֆիզկուլտուրան դասավանդում են իրենց գործն իմացող եւ սիրող ուսուցիչներ Օնիկ Թովմասյանը եւ Նարինե Զաքարյանը:
Բնականաբար, յուրաքանչյուր դպրոցում երեխաներն ունենում են իրենց սիրած մարզաձեւերը: Մեր աշակերտներից շատերը հրապուրված են բասկետբոլով: Այդ գեղեցիկ խաղը նպաստում է համակողմանի ֆիզիկական զարգացմանը: Ֆուտբոլի գնդակն էլ գերել է բառացիորեն բոլոր տղաներին: Ամեն մեկը ձգտում է լավ խաղալ, իրավունք ստանալ ելույթ ունենալու «Կաշվե գնդակ»-ի մրցումներում:
Սպորտի հետ երեխաների մտերմությունը սկսվում է ֆիզկուլտուրայի՝ մեթոդապես ճիշտ եւ հետաքրքիր կազմակերպված դասից. չէ՞ որ շարժուն խաղերը, մարմնամարզական վարժությունները եւ թեթեւատլետիկական պարապմունքները բերկրանք են պատճառում: Հենց այդ ժամանակ էլ նրանց մեջ ցանկություն է առաջանում անդամագրվել սեկցիային, տիրապետել մարզական վարպետության այբուբենին:
Մեր ամենօրյա գործունեության մեջ գլխավոր շեշտը դնում ենք բոլոր աշակերտների նպատակասլաց ֆիզիկական դաստիարակության վրա՝ գտնելով, որ սպորտով հրապուրված երեխաները կարող են իրենց ընդունակությունները զարգացնել՝ մասնակցելով տարբեր մարզադպրոցներում անցկացվող պարապմունքներին:
Իսկ մեր հիմնական խնդիրը մենք համարում ենք առողջ պատանիներ եւ աղջիկներ դաստիարակելը: Միայն այդ դեպքում կունենանք գեղեցիկ կազմվածքով, առողջ մտածելակերպով օժտված սերունդ:
Օ. ԹՈՎՄԱՍՅԱՆ
հ.110 հիմն. դպրոցի ֆիզկուլտուրայի
ուսուցիչ
«Առավոտ»
14.11.2018
