ՀՀԿ-ական Ռազմիկ Մարտիրոսյանի կարծիքով, այս ընտրությունները լինելու են միստիկական-առասպելական. «Անկախ այն բանից, թե քանի կուսակցություններ են մասնակցում այս ընտրություններին, մենք գործ ունենք երկու բևեռացված առասպելների հետ. մեկը Նիկոլն է, մյուսը՝ հանրապետականները»,-ասաց նա:
Ռազմիկ Մարտիրոսյանի դիտարկմամբ՝ հանրապետականների այս ընտրություններին մասնակցելն ավելի է սրում տիրող իրավիճակը. «Հեղափոխական կամ Նիկոլ միստիֆիկացիան դիտարկվում է սպիտակ ուժ, իսկ ՀՀԿ-ն՝ հակառակը: Այս ընտրություններին հանրապետականներին լուրջ փորձություն է սպասվում»:
Ասուլիսի մյուս բանախոս, ՀՅԴ խմբակցության անդամ, ԱԺ պատգամավոր Արմենուհի Կյուրեղյանի համոզմամբ էլ, Նիկոլ Փաշինյանի բերած սև և սպիտակների պայքարը դուր է եկել նաև հանրապետականներին. «Հանրապետականն ինքն է ուզում, որ հանրության մեջ ամրանա սև և սպիտակ ուժերի գաղափարախոսությունը»:
Կյուրեղյանն ընդգծեց, որ Հայ հեղափոխական դաշնակցությունը ոչ սև է, ոչ էլ սպիտակ. «ՀՅԴ-ն իր տեղն ունի և ո՛չ սև է, ո՛չ էլ սպիտակ: Եկեք դաշտը չբաժանենք սևերի ու սպիտակների և կենտրոնանանք քաղաքական ուժերի ներկայացրած ծրագրերի վրա»:
Ասուլիսի վերջում Ռազմիկ Մարտիրոսյանն առաջարկեց սպասել դեկտեմբերի 9-ի ընտրություններին, որից հետո կերևա, թե ինչպիսի քաղաքական դաշտ ունենք:
Մարիամ Հակոբյան
