«Պոչամբարների 99%-ը գտնվում է Սյունիքի մարզում, և մինչ օրս որևէ վճարում այդ մարզպետարանի կամ համայնքային բյուջեներում չի արվել»,-այս մասին նոյեմբերի 14-ին ԱԺ քառօրյա նիստի ժամանակ հայտարարեց «Ծառուկյան» խմբակցության պատգամավոր Սերգեյ Բագրատյանը։
Նա այս երևույթը որակեց հանցագործություն և ասաց, որ շատ պարզ մեխանիզմով կարելի է հայտնաբերել թաքնված հանքարդյունաբերողներին։
«Ընդամենը հարկավոր է պաշտոնական հարցում անել հանքարդյունաբերության ոլորտում գործող սեփականատերերի վերաբերյալ՝ իրենց ներդրած գումարի ծագումնաբանությունը պարզելու համար, և վստահեցնում եմ, որ շատերի դեպքում կպարզվի, որ այս մարդը մինչև 1 մլրդ դրամի ներդրումը ունեցել է հավաքարարի աշխատավարձ, այսինքն` 60 000 դրամով 1 մլրդ դրամի ներդրում է արել հանքարդյունաբերության մեջ»։
Բագրատյանի խոսքով, այս մեխանիզմի միջոցով կարելի է կարծեցյալ սեփականատիրոջ ձեռքից վերցնել բաժնեմասը և փոխանցել պետությանը։
«Եթե մենք այսպիսի երկու դեպք իրականացնենք և բաժնեմասը դառնա ազգային հարստություն (դա հենց ազգային հարստություն էր ի սկզբանե), մենք շատ մեծ լավություն կանենք հանրությանը, և սա կլինի նախադեպ, որպեսզի այլևս որևէ սեփականատեր ՀՀ-ում գաղտնիության պայմաններում չփորձի գործել»,-ասաց «Ծառուկյան» խմբակցության պատգամավորը։
Սոնա ԳԵՎՈՐԳՅԱՆ
