Մենք առաջնորդվելու ենք օրենքի շրջանակներում, և նրանք, ովքեր անօրինական գործողություններ կկատարեն, ապա իրավապահ մարմինների կողմից համապատասխան արձագանք կստանան: Այս մասին Aravot.am-ի հետ զրույցում ասաց Արցախի անվտանգության խորհրդի քարտուղար Վիտալի Բալասանյանը` անդրադառնալով «Սասնա ծռեր» համահայկական կուսակցության կողմից նոյեմբերի 17-ին Արցախ նախատեսվող ավտոերթին:
Նա նշեց, որ տվյալ համայնքները, որոնցում նախատեսվում է իրականացնել ավտոերթը, եթե սահմանված կարգով կիրազեկվեն, ապա օրենքի շրջանակներում թույլտվություն կտրվի:
«Ժամանակին ես իմ գնահատականը տվել եմ և նշել, որ «Սասնա ծռեր» զինված խումբը ահաբեկչություն է կատարել, և չի կարելի ահաբեկիչներին համաներման արժանացնել:
Այն ժամանակ ՀՀ իրավապահ մարմինների կողմից նրանց «մեծ աջակցություն» է ցուցաբերվել, քանի որ ահաբեկչության հոդվածով չեն դատվել: Բացի այդ, նրանք նաև չպետք է սեփականաշնորհեին մեր ազգային արժեքները` ընտրելով որպես իրենց անվանում»,- նշեց Վ. Բալասանյանը:
Նա կարծիք հայտնեց, որ Արցախում այնքան մարդ չի գտնվի, որպեսզի հնարավոր լինի կուսակցությունը ստեղծել:
«Կհորդորեի համահայկական կուսակցության ստեղծման գաղափարից հրաժարվել: Ես չգիտեմ, թե նրանք մեր օրենքներին ինչքանով են ծանոթ, սակայն այն չի թույլատրում քույր կուսակցության կամ կուսակցության մասնաճյուղ ստեղծել Արցախում»,- ընդգծեց Վ. Բալասանյանը:
Դավիթ ԱԲԱՂՅԱՆ
