Սանկտ Պետերբուրգի գրախանութներում, բացի ժամանակակից հեղինակների կողմից մակագրված գրքերից, նաեւ տարբեր պատկերներով սառնարանի մագնիսներ ու հուշանվերներ են վաճառում, ինչպես բոլոր երկրներում: Ռուսաստանի պարագայում դրանց բնույթը մի քիչ այլ է: Կարող ես տեսնել ռուս կայսրերի ու կայսրուհիների դիմապատկերներից մինչեւ ՌԴ նախագահ Վլադիմիր Պուտինին: Ընդ որում, ամենաշատը Պուտինի պատկերով սառնարանի մագնիսներն են՝ Պուտինն ակնոցով, Պուտինն առանց ակնոցի, Պուտինը մետաղյա սաղավարտով, Պուտինն ականջակալներով… Մի խոսքով՝ ցանկացողները կարող են սառնարանին փակցնելու համար ցանկացած տեսքով Պուտին ընտրել, կարեւորը՝ նա ամենուր է:
Պուտինին հավասար պաշտելի է նաեւ կոմսոմոլը: Օրինակ՝ թանգարան դարձած Պետրոպավլովյան ամրոցի սրահներից մեկում պատմական ցուցանմուշների կողքին հսկա տառերով պաստառ էր փակցված՝ «Կոմսոմոլը կա» մակագրությամբ: Թանգարանի աշխատակցուհին հպարտությամբ պարզաբանեց պաստառի նպատակը՝ այս տարի իրենց կոմերիտմիության 100-ամյակն է լրանում:
Լուսանկարը՝ ԳՈՀԱՐ ՀԱԿՈԲՅԱՆԻ
«Առավոտ»
13.11.2018
