«ԱԳՆ-ն կապ է հաստատել Գերմանիայի հետ՝ ճշտելու տեղեկատվության արժանահավատությունը: Հաստատում ենք՝ ներկայումս Գերմանիայում որեւէ տեղեկություն չկա հետաքննության մասին, որը կվերաբերեր Աշոտ Սմբատյանին»,-լրագրողների հետ զրույցում այսօր անդրադառնալով տեղեկություններին, թե վերջերս Գերմանիայում գործող հայկական մաֆիայի խմբերի հետ կապ ունի նաեւ այդ երկրում ՀՀ դեսպան Աշոտ Սմբատյանը, ասաց ՀՀ ԱԳՆ մամուլի խոսնակ Աննա Նաղդալյանը:
«Այդ միջադեպն ուղղված էր Բեռլինում ՀՀ դեսպանության բնականոն գործունեության խաթարմանը, սակայն այն որեւէ ազդեցություն չի ունեցել: Մենք շարունակում ենք մեր քայլերը՝ ՀՀ-Գերմանիա օրակարգային հարցերի առաջխաղացման եւ ամրապնդման ուղղությամբ»,-վստահեցրեց Աննա Նաղդալյանը:
Նա նաեւ հիշեցրեց, որ Բեռլինի երկրամասային դատարանը վճռել էր լրատվամիջոցներին արգելել անհիմն տեղեկատվություն տարածել Աշոտ Սմբատյանի մասին. «Կայքերից հեռացվել են այն ձեւակերպումները, որոնք վերաբերում էին ՀՀ դեսպանին»:
Ինչ վերաբերում է հարցին, թե արդյո՞ք ՀՀ ԱԳՆ-ն փորձել է ինքը պարզել դեսպանի հետ առնչվող տեղեկության արժանահավատությունը, թե նրա բանավոր խոսքին է հավատացել, Նաղդալյանն ընդգծեց. «Ասացի՝ մենք Գերմանիայի պատկան մարմինների հետ ենք կապ հաստատել եւ ճշտել: Ավելին չեմ կարող ասել»:
https://www.facebook.com/aravot.am/videos/532459190554146/
Լուիզա ՍՈՒՔԻԱՍՅԱՆ
