Վարդանյան ընտանիքի հիմնադրամն առաջարկել է իրենց կողմից Մյասնիկյան արձանի հարեւանությամբ բարեկարգվող այգին, որտեղ շինարարական եւ շատրվանների տեղադրման աշխատանքներ են իրականացվում, նվիրաբերել Երեւան համայնքին: Այսօր Երեւանի ավագանու նիստին այս մասին հայտնեց քաղաքապետարանի իրավաբանական վարչության պետ Զավեն Առաքելյանը: Պարոն Առաքելյանը տեղեկացրեց, որ այգու ստորգետնյա, բետոնային աշխատանքներն արդեն ամբողջությամբ ավարտված են, ներկայումս էլ սալիկապատման աշխատանքներ են իրականացվում: Որոշման ընդունմամբ հիմնադրամին հնարավորություն կընձեռվի երկարացնել շինաշխատանքների պայմանագիրը եւ ավարտին հասցնել դրանք:
Իրավական հարցերով մշտական հանձնաժողովի նախագահի տեղակալ Գայանե Մելքոն Մելքոնյանը այս հարցի առնչությամբ մտահոգություն հայտնեց՝ ասելով, որ ճիշտ է հանձնաժողովը քննարկել է այս նախագիծը եւ տվել դրական եզրակացություն, այդուհանդերձ այգու տարածքում առկա են շատ առողջ ծառեր եւ անհրաժեշտ է ուշադրություն դարձնել դրանց. «Շինհրապարակում գտնվելը արդեն իսկ նրանց համար անբարենպաստ է եւ այնպես չլինի, որ այս ամիսների երկարաձգման արդյունքում մենք ունենանք վնասված եւ տապալված ծառեր»:
Ի պատասխան Հայկ Մարությանն ասաց, որ այսօր ժամը 1-ին իրենք հանդիպելու են այգին բարեկարգող ընկերության հետ եւ քննարկելու են բոլոր հարցերը՝ սկսած ժամկետներից, վերջացրած ծառերի եւ շինաշխատանքներից:
Ավագանու նիստի օրակարգում ընդգրկված է 10 հարց:
Լուսինե ԲՈՒԴԱՂՅԱՆ
