ՀՀ վարչապետի պաշտոնակատար
պարոն Ն.Վ. Փաշինյանին
ՀՀ ԳԱԱ ՕԴՔԳՏԿ ՊՈԱԿ-ի աշխատակիցներից
Դիմում
Սիրելի պարոն վարչապետ`
ՀՀ գույքի կառավարման պետական վարչության կողմից կառավարության հաստատմանը ներկայացվելու համար պատրաստվել է նախագիծ, որի 1-3 կետերով, կառավարության որոշմամբ, նախատեսվում է ք.Երևանի Ազատության 26 հասցեում գտնվող ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոն ՊՈԱԿ-ից (այսուհետ` Կենտրոն) հետ վերցնել 2 լաբորատոր մասնաշենք և արհեստանոցի տարածքի մի մասը և վարձակալության տրամադրել 2 կազմակերպությունների:
Ցանկանում ենք տեղեկացնել, որ Կենտրոնին անժամկետ և անհատույց տրամադրված տարածքների օտարումը նոր երևույթ չէ և դրա սկիզբը դրվել է դեռևս Ռ.Քոչարյանի նախագահության օրոք, երբ ՆԳ նախարար Ս.Սարգսյանի հովանավորությամբ ինստիտուտի 6 լաբորատոր մասնաշենքերից մեկը իր հարակից տարածքներով օտարվել և տրվել էր ԱՐՄԵՆԻԿՈՒՄ ընկերությանը իբրև թե ՁԻԱՀ-ի նոր դեղապատրաստուկի ստացման համար (հիմքերը նման էին` մի քանի միլիոնների ներդրում): Դրա ֆիասկոյից հետո, 2015 թվականին տարածքը Կենտրոնին վերադարձվելու փոխարեն փոխանցվեց ՀՀ քննչական կոմիտեին։
Սրան հաջորդեց ՀՀ ԳԱԱ Օրգանական քիմիայի ինստիտուտի, ՀՀ ԳԱԱ Մնջոյանի անվան Նուրբ Օրգանական քիմիայի ինստիտուտի և ՀՀ ԳԱԱ Մոլեկուլի Կառուցվածքի ուսումնասիրման կենտրոնի միավորումը, որի արդյունքում Զ. Սարկավագի փողոցում գտնվող Օրգանական քիմիայի ինստիտուտը ֆիզիկապես տեղափոխվեց Ազատության 26 և ձևավորվեց Կենտրոնը:
Դրանից հետո, արդեն նախագահ Ս.Սարգսյանի հովանու ներքո իրականացվող բնակարանաշինության ծրագրի համար, Կենտրոնից վերցվեց տարածքի մի խոշոր հատված, ինչի արդյունքում քանդվեց Կենտրոնի վիվարիումը և վնասվեց գազապաստարանը:
Այժմ, ցավով արձանագրում ենք, որ նույն քաղաքականությունը փորձ է արվում շարունակել արդեն նոր ոճով, եթե այն ժամանակ կար ՀՀ ԳԱԱ գոնե ֆորմալ համաձայնությունը, այժմ, ՀՀ գույքի կառավարման պետական վարչությունը որոշման նախագիծը պատրաստում է առանց համաձայնեցնելու ակադեմիայի և ամենակարևորը ՔԱՂԱՔԱՑԻ գիտնականների հետ, ովքեր անկախության տարիներից ի վեր աշխատում են չնչինագույն աշխատավարձով և ստորացուցիչ պայմաններում, համարելով, որ «Հանրապետությունում կան ավելի կարևոր հարցեր»։
Ձեր ուղերձներում ասում եք, որ Հայաստանը պետք է դառնա առաջատար տեխնոլոգիաների երկիր, սակայն այս նախագիծը գալիս է ապացուցելու այդ պնդման հակառակը, քանի որ նոր կառավարությունը, փոխարենը հետ պտտի գիտության հանդեպ նախորդ իշխանությունների ավերիչ և նվաստացուցիչ քաղաքականությունը, իր այս նախագծով հենվում է այդ քաղաքականության դառը արդյունքների վրա:
Հայտնում ենք, որ այս նախագծի հաստատմամբ վերջնականապես կզրկեք քիմիական գիտությունները որպես Հայաստանի գիտական և արտադրական ներուժի կարևոր բաղադրիչ կայանալու բոլոր հնարավորություններից:
Սույն նամակով խնդրում ենք`
- կասեցնել այս նախագիծը և թույլ տալ կողմերին գալ փոխշահավետ համաձայնության` հստակեցնելով վարձակալության և համակեցության պայմանները` առանց հետ վերցնելու Կենտրոնին հանձնված գույքը,
- հստակեցնել գիտության բնագավառում վարվող քաղաքականությունը` մշակելով և հանրայնացնելով Նոր Հայաստանում գիտության զարգացման ռազմավարությունը և ճանապարհային քարտեզը,
- գիտությանը վերաբերող որոշումներ կայացնելիս հենվել այդ ռազմավարության վրա, որպեսզի հանրությանը հասկանալի լինեն ընդունվող որոշումների մոտիվացիան և նպատակները:
Հարգանքներով և Դուխով,
ՀՀ ԳԱԱ ՕԴՔ ԳՏԿ աշխատակից, քաղաքացի գիտնականներ
Դիմումին կցվում է ՀՀ ԳԱԱ ՕԴՔ ԳՏԿ աշխատակիցների ստորագրությունները
