Հայաստանի ծանրամարտի ֆեդերացիայի գլխավոր քարտուղար, ազգային հավաքականի գլխավոր մարզիչ Փաշիկ Ալավերդյանն իր սաներից ավելի մեծ ակնկալիքներ ուներ մարզաձեւի աշխարհի առաջնությունից: Աշգաբադից վերադառնալուց հետո «Զվարթնոց» օդանավակայանում նա լրագրողներին ասաց. «Սա մեր մրցումների սովորական շարունակությունն էր: Եվրոպայից վերադարձել էինք չեմպիոններով, 30-31 մեդալով: Ծանրորդներն աշխարհի առաջնությունից 10-12 օր առաջ պետք է փորձամրցում անցնեն՝ կամ մարզումների ժամանակ, կամ մրցման: Մեր ծանրորդների փորձամրցումը եղավ Եվրոպայի երիտասարդական առաջնությունում: Ընդհանուր առմամբ մասնակցությունը նորմալ է: Բայց գոհ կլինեի, եթե չորս չեմպիոնական տիտղոս նվաճեինք»:
Անդրադառնալով Անդրանիկ Կարապետյանին՝ Փաշիկ Ալավերդյանն ասաց. « Նրա մոտ այդ օրը պոկում վարժությունը չստացվեց: Բայց ոչինչ: Դեկտեմբերին Անդրանիկը կմասնակցի Քաթարի գավաթի առաջնությանը, որը նույնպես օլիմպիական խաղերի վարկանիշային մրցաշար է, եւ իր հասանելիք միավորների պաշարը կհավաքի»:
Աշոտ ՀԱԿՈԲՅԱՆ
