Սննդամթերքի անվտանգությունը մարդու կյանքի, առողջության և շրջակա միջավայրի անվտանգության երաշխիքների ապահովումն է:
Սննդամթերքի անվտանգության պահպանման գործում կան խախտումներ, որոնց հետ անմիջականորեն առնչվում են սպառողները: Խախտումներից խուսափելու համար պետք է ուշադրություն դարձնել ապրանքի մակնշմանը, պիտանելիության ժամկետին, սննդամթերքի կեղծմանը, սանիտարահիգիենիկ պայմաններին: Սննդամթերքի, դրա հետ շփվող նյութերի և սննդային հավելումների փաթեթավորումը և մակնշումը չպետք է վնասված լինեն: Հում մսեղիքի վաճառք կարող է իրականացվել միայն անասնաբուժասանիտարական փորձաքննության կտրոնի առկայության դեպքում:
Սոցիալական հարցումների արդյունքում պարզվել է, որ գնորդների 54%-ը մթերք է գնում փողոցային առևտրի պայմաններում: Փողոցային առևտրի վայրերից գնումներ կատարելուն ավելի քիչ են հակված Երևանում (33%), իսկ ավելի շատ` մարզերի քաղաքներում (61%) ու գյուղերում (72%):
Ուսումնասիրությունները ցույց են տալիս, որ մարդիկ կարևորում են երեք գործոններ`պիտանելիության ժամկետ (մարդկանց 68%-ը), մթերքի թարմություն (39%), որակ (36%):
Սննդամթերքի անվտանգության պետական ծառայության պետի տեղակալ Լուսինե Դավթյանը զրույցում նշեց հաճախ հանդիպող խախտումները, որոնք վնասակար ազդեցություն են ունենում մարդու օրգանիզմի վրա և կարող են առաջացնել բազմաթիվ հիվանդություններ.
– Մարդկանցից քչերն են լվանում ձուն գնելուց հետո: Սա հիգիենայի կանոնների խախտում է, ձուն պետք է լվանալ օճառով, այնուհետև պահել սառնարանում: Հաջորդ խախտումը, որը շատ է հանդիպում առօրյայում, նույն տախտակի վրա տարբեր սննդամթերք կտրատելն է. առաջանում են մանրէներ, որոնք սննդի միջոցով անցնում են մարդու օրգանիզմ: Յուրաքանչյուր մթերք կտրատելուց հետո անհրաժեշտ է լվանալ տախտակը, այնուհետև կտրատել հաջորդ սնունդը: Կանոնները պետք է պահպանել հատկապես հում միս կտրատելուց հետո,- մեզ հետ զրույցում նշեց Լուսինե Դավթյանը:
Այս խորհուրդներին գումարվեց նաև հաց ուտելուց առաջ ձեռքերը պարտադիր օճառով լվանալը, քանի որ մանրէները տարածվում են ամենաշատը կեղտոտ ձեռքերի միջոցով:
Այժմ հանրապետության տարբեր տարածքներում կարելի է հանդիպել փողոցում առևտուր անողների: Սպառողները պետք է իմանան, որ փողոցային առևտուրը արգելված է: Այդ շղթայում շրջանառվող և իրացվող սննդամթերքի ծագման աղբյուրը հասկանալը կամ բացահայտելը գրեթե անհնար է:
Շահանե ԲԱՂԴԱՍԱՐՅԱՆ
