Ծանրամարտի Հայաստանի ազգային հավաքականի բժիշկ Դավիթ Մոսինյանն այս օրերին մեր ընտրանու հետ Թուրքմենստանի մայրաքաղաք Աշգաբադում է: Նա պատասխանել է ashgabat2018.com կայքի հարցերին:
– Առաջին անգա՞մ եք Թուրքմենստանում:
– Ես լսել եմ, որ Աշգաբադում անցկացվում են լայնածավալ մրցույթներ: Առաջին անգամ եմ այստեղ եւ հնարավորություն ունեցա անձամբ տեսնել այն, ինչ լսել եմ նախկինում:
– Կարո՞ղ եք պատմել ձեր ազգային հավաքականի մասին:
– Հայաստանից ութ մարզիկ է եկել ծանրամարտի աշխարհի առաջնություն: Չորսական կին եւ տղամարդ: Նրանց մեջ օլիմպիական մեդալակիրներ ու Եվրոպայի երիտասարդական չեմպիոններ կան: Մենք աշխարհի այս առաջնությանը հասցրինք ընդամենը երկու շաբաթ նախապատրաստվել, քանի որ մասնակցում էինք Եվրոպայի երիտասարդների առաջնությանը: Մեր ծանրորդները աշխատում են լավ արդյունքներ ցույց տալ: Հակոբ Մկրտչյանը մինչեւ 89 կգ քաշային կարգի տղամարդկանց մրցաշարում փոքր արծաթե մեդալակիր դարձավ: Իսկ այսօր, աշխարհի առաջնության 9-րդ օրը, մենք սպասում ենք Եվրոպայի չեմպիոն Սիմոն Մարտիրոսյանի հաջող ելույթին:
Աշոտ ՀԱԿՈԲՅԱՆ
