Հայ-թուրքական հարաբերությունների նորմալացման նոր ջանքեր կգործադրվե՞ն առաջիկայում`այսօր ԵՊՀ-ում նախագահ Արմեն Սարգսյանից հետաքրքրվեց լրագրողներից մեկը` նկատի ունենալով, որ նախագահն իր վերջին հարցազրույցներում խոսել էր հայ-թուրքական հարաբերությունների մասին:
Նախագահը պատմեց, որ վերջերս շվեյցարական պետական հեռուստաընկերությանը եւ ֆրանսիական «TV 5»-ին տված հարցազրույցում լրագրողն իրեն հարցրել է`եթե այս պահին իր առջեւ կանգնած լիներ Թուրքիայի նախագահը, ի՞նչ կասեր ինքը: «Բարի լույս, որովհետեւ առավոտ էր եւ որպես հայ կասեի` մենք խոսելու բան ունենք»,- պատասխանել է նախագահը: Արմեն Սարգսյանն այսօր հստակեցրեց`սա քաղաքական հայտարարություն չէ, այս պահին Թուրքիայի նախագահի նկատմամբ իր վերաբերմունքը: Նա հավելեց նաեւ, որ քաղաքական հայտարարությամբ այս հարցում ՀՀ ԱԳՆ-ն պետք է հանդես գա:
Պատասխանելով նախագահի լիազորությունների ընդլայնման մասին հարցին, Արմեն Սարգսյանն ասաց, որ այդ լիազորությունների ավելի կամ պակաս լինելն իր համար էական չէ: Հիշեցրեց, որ երբ իրեն առաջարկ արվեց` նախագահի լիազորությունները Սահմանադրությամբ ամրագրված էին եւ դրանց մի քիչ ավելի կամ պակաս լինելն իրականում դեր չունի, քանի որ ինքը շատ հստակ է պատկերացնում, թե ի՞նչ պետք է անի, որ ծառայի երկրին. «Բաղրամյան 26-ը ՀՀ պետական շենքերից մեկն է: Ես նույն ձեւով, եթե օրենքը փոխվել է, կգնամ Բաղրամյան 26: Դրանից ես չեմ փոխվի»:
Այլ մանրամասները`տեսանյութում
Լրագրողներից մեկն էլ հարցրեց`ի՞նչ հարաբերությունների մեջ է նախկին նախագահ Սերժ Սարգսյանի հետ, մանավանդ, որ վերջինս էր իրեն առաջարկել ՀՀ նախագահի պաշտոնը: Արմեն Սարգսյանն ասաց, որ Սերժ Սարգսյանին վաղուց չի տեսել. «Վերջին ժամանակներում հարաբերություններ չեմ ունեցել»:
Նելլի ԳՐԻԳՈՐՅԱՆ
