«Թեեւ ներկայիս կառավարությունը, ի տարբերություն նախորդի, իր ծրագրում ամրագրել է ավելացնել կրթության ֆինանսավորումը տասը տոկոսով, բայց դա չի անդրադառնալու ուսուցիչների աշխատավարձերի վրա»,-«Տեսակետ» մամուլի ակումբում այսօր լրագրողների հետ հանդիմանն այսպիսի համոզմունք հայտնեց կրթության փորձագետ Սերոբ Խաչատրյանը:
Նա նկատեց. «Հիմա ԱԱԾ աշխատակիցների, բժիշկների աշխատավարձերը բարձրանում են, իսկ ուսուցիչներինը՝ ոչ: Ճիշտ է, ԿԳՆ-ն ցանկանում է բարձրացնել, բայց՝ ընտրողաբար: Այսինքն, բարձրացնելու է այն ուսուցիչների աշխատավարձերը, որոնք կհաղթահարեն համապատասխան շեմը: Իսկ բազային աշխատավարձը, ցավոք, չի բարձրանա»:
Ինչ վերաբերում է ԿԳ նախարարի ԺՊ Արայիկ Հարությունյանի՝ օրերս հնչեցրած տեսակետին, թե կրթության ոլորտը, այդ թվում՝ հայաստանյան բուհերը, օպտիմալացնելու կարիք կա, փորձագետը դրանում վտանգներ է տեսնում. «Ամեն բուհ իր մասնագետներին է պատրաստում, ուստի համաձայն չեմ բուհերն օպտիմալացնելու մտքի հետ: Բացի դա, որոշ մասնավոր բուհեր կարող են փակվել: Որոշ բուհեր կարելի է նաեւ միավորել, բայց դա էապես չի ազդի վիճակի վրա»:
Սերոբ Խաչատրյանը մեկ այլ խնդիր էլ մատնանշեց. «Ամեն օր կրթական գործընթաց իրականացնողները համաձայն չեն կրթական քաղաքականության հետ: Ո՞նց եք պատկերացնում կրթության զարգացում: Նախարարությունը չի կարող 37 000 ուսուցչի եւ 15 000 դասախոսի վերահսկել: Եթե վերջիններս դեմ են բոլոնյան գործընթացներին եւ տասներկուամյա կրթությանը, ուրեմն չեն անում դրանցից բխող գործառույթները կամ անում են այն դեպքում, երբ եկել են ստուգումների»:
Լուիզա ՍՈՒՔԻԱՍՅԱՆ
