ՀՀԿ-ական պատգամավոր Արմեն Աշոտյանի օրենսդրական նախաձեռնությանը այսօրվա նիստում կառավարությունը բացասական եզրակացություն տվեց: «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքում փոփոխություններ ու լրացումներ կատարելու նախագծով Աշոտյանն առաջարկում է փոխել այն իրավակարգավորումը, ըստ որի՝ վարչապետին է վերապահված իրեն սպասարկելու նպատակով հատուկ սարքավորված ինքնաթիռից և ուղղաթիռից բարձրաստիճան պաշտոնատար անձանց օգտվելու կարգը սահմանելու լիազորությունը: Աշոտյանն առաջարկում է, որ այդ լիազորությունը վերապահվի կառավարությանը:
Հարցը զեկուցող արդարադատության նախարարի պաշտոնակատար Արտակ Զեյնալյանն ասաց. «Երկրորդ հոդվածով առաջարկվում է նախատեսել վերոհիշյալ սպասարկումից այլ բարձրաստիճան պաշտոնատար անձանց օգտվելու նպատակի, օգտագործման անձանց ցանկի և պետական բյուջեից հատկացված գումարների մասին վարչապետի պաշտոնական կայքում հրապարակել որոշակի տեղեկություններ՝ այդ ծախսերի նկատմամբ թափանցիկություն ապահովելու համար»:
Նա նշեց, որ նպատակահարմար չէ ընդունել այս նախագիծը այն պատճառաբանությամբ, որ վարչապետին կցված ուղղաթիռի և ինքնաթիռի սպասարկման կարգը ճիշտ կլինի, որ հաստատի հենց ինքը՝ վարչապետը, քանի որ կան պետական անվտանգության հանգամանքներ: Ըստ պարոն Զեյնալյանի՝ կառավարությանն առաջարկեց բացասական եզրակացություն տալ այս օրենքի նախագծին՝ ելնելով պետական ու ծառայողական գաղտնիք չհրապարակելու նկատառումներից:
Առաջին փոխվարչապետ Արարատ Միրզոյան իր զարմանքը հայտնեց Աշոտյանի առաջարկի վերաբերյալ, ասելով՝ «Ըստ էության, հեղինակը՝ շատ հարգարժան պարոն Աշոտյանը, բազմաթիվ տարիներ ուներ այս շտկումը և թափանցիկության աստիճանն ապահովելու համար և ոնց որ թե բաց է թողել այդ հնարավորությունը, ինչի համար ափսոսում եմ»:
Արարատ Միրզոյանն ասաց, որ հատկապես պարոն Աշոտյանի դեպքում, որը բազմիցս աչքի է ընկել հատկապես ազգային անվտանգության, պետական անվտանգության մասին հոգածությամբ լեցուն զանազան ելույթներով, սա զարմանալի է:
Նելլի ԲԱԲԱՅԱՆ
