«Պարզ էր, բոլորը տեսնում էին այդ այգիները, բոլորը դրա մասին գիտեին, խոսում էին, մնում էր միայն փաստաթղթավորել այդ ամենը, խախտումը հայտնաբերել, լուսաբանել եւ վերջակետ դնել»,- խորհրդարանում լրագրողների հետ զրույցում ասաց Արարատի մարզպետ Գարիկ Սարգսյանն`անդրադառնալով նախկին վարչապետ Հովիկ Աբրահամյանի ընտանիքին պատկանող` ապօրինի ջրագծերի եւ ստվերային այգիներ հայտնաբերելու գործին: Բացահայտման գործում ներգրավված են եղել Արարատի մարզպետարանի, Արտաշատ ՋՕԸ-ի աշխատակիցները` Պետական վերահսկողական ծառայության աշխատակիցների հետ:
Գարիկ Սարգսյանը մանրամասնեց`ի՞նչ էր իրականում տեղի ունեցել. «Մխչյան պոմպակայանից ջուրը, որը երեք խողովակներով մղվում է վեր, այդ խողովակներին միացել էին տարբեր ուրիշ մանր խողովակներով և ջուրը մղում էին, այսպես ասած, ստվերային այգիները ոռոգելու համար»: Մարզպետն ասում է, որ այդ այգիները վերահսկողությունից դուրս մնացած այգիներ են եղել, որովհետեւ ՋՕԸ-ն վերահսկողությունից դուրս է եղել. «Այսինքն՝ ջրառից գողություն էր արվում»: Հարցին, այլ պաշտոնյաների վերաբերյալ էլ հնարավո՞ր են նմանօրինակ բացահայտումներ, Գարիկ Սարգսյանը պատասխանեց. «Ոչինչ բացառել չի կարելի»:
Այժմ ստուգումներ են իրականացվում նաեւ գյուղական համայնքներում, դեռեւս մանր-մունր խախտումներ են բացահայտվել:
Այլ մանրամասները` տեսանյութում
Նելլի ԳՐԻԳՈՐՅԱՆ
