ՀՀ տարածքային կառավարման և զարգացման նախարար Սուրեն Պապիկյանը չեղարկել է Ստրասբուրգ այցը:
Տեղեկացնենք՝ այսօր՝ նոյեմբերի 7-ին, նախատեսվում էր նախարարի մասնակցությունը Ստրասբուրգում Եվրոպայի խորհրդի տեղական և տարածքային իշխանությունների կոնգրեսի 35-րդ լիագումար նստաշրջանին: Ըստ օրակարգի՝ ծրագրված էր նաև Սուրեն Պապիկյանի ելույթը, որին պետք է հաջորդեր ԵԽ Կոնգրեսի պատվիրակների հետ քննարկում, հարցուպատասխան:
Սակայն Սուրեն Պապիկյանը նստաշրջանի մեկնարկից մի քանի օր առաջ տեղեկացրել է, որ իր մասնակցությունը նստաշրջանին չեղարկվում է՝ պատճառաբանելով, որ ՀՀ-ում խորհրդարանական ընտրությունների նախաշեմին պատասխանատու աշխատանք ունի կատարելու և ցավում է, որ չի կարող մասնակցել:
Այդ պատճառով նստաշրջանի մեկնարկից մեկ օր առաջ օրակարգում փոփոխություն է մտցվել:
Aravot.am-ի հետ զրույցում ԵԽ Կոնգրեսի նորընտիր նախագահ Անդրես Կնապեն ափսոսանք հայտնեց, որ նախարարը չի կարող մասնակցել նստաշրջանին, բայց մյուս կողմից նշեց՝ ըմբռնումով են մոտենում, քանի որ նա կարևոր քաղաքական առաքելություն ունի:
Նշենք՝ այսօր ԵԽ Կոնգրեսի նստաշրջանի լիագումար նիստին կհյուրընկալվեն Խորվաթիայի փոխվարչապետ Մաիցա Պեչինովիչ Բուրիչը, Վրաստանի փոխվարչապետ, տարածքային զարգացման և ենթակառուցվածքների նախարար Մայա Ցկիտիշվիլին:
Տաթեւ ՀԱՐՈՒԹՅՈՒՆՅԱՆ
Ստրասբուրգ
