Այս տարվա ապրիլ-մայիսին եւ դրանից հետո, կարելի է ասել, հայաստանյան ողջ քաղաքական դաշտը ենթարկվում է Փաշինյանին: Գարնանը հեղափոխությանը միացել էր նաեւ Զարուհի Փոստանջյանը, ում հաճախ էինք տեսնում հանրահավաքների, քայլերթերի ժամանակ:
Ապրիլի 22-ին ոստիկանությունը ձերբակալեց Նիկոլ Փաշինյանին, իսկ երեկոյան Հանրապետության հրապարակն ավելի մարդաշատ էր, քան նախորդ հանրահավաքների ժամանակ: Երբ չկար հեղափոխության առաջնորդը, ձերբակալված էին նաեւ Սասուն Միքայելյանը եւ Արարատ Միրզոյանը, հրապարակն իրենց ելույթներով թեժ էին պահում ոչ «պրոֆեսիոնալ» միտինգավորները: Այդ օրը Փոստանջյանը մոտեցավ ամբիոնին եւ ցանկացավ ելույթ ունենալ: Հրապարակը, սակայն, սկսեց սուլել եւ բացականչել՝ «հեռացի՛ր»: Փաշինյանի կինը՝ Աննա Հակոբյանը, նույնպես բարձրացավ բեմահարթակ եւ բառացիորեն քաշքշելով՝ Զարուհու ձեռքից խլեց բարձրախոսը: Երկար ժամանակ երկու կանայք իրար ձեռքից խլխլում էին բարձրախոսը:
Այնուհետեւ Աննա Հակոբյանն իր ելույթում կատարվածը հիմնավորեց նրանով, որ Զարուհին ժամանակին ասել է, թե «Նիկոլը ծախված է»: Հրապարակի հասարակությունը մերժող «հու»-երով ճանապարհեց Զարուհի Փոստանջյանին, ում ժամանակին բոլորովին հակառակ վերաբերմունքի էր արժանացնում:
Այս միջադեպը, կարծես թե, բեկումնային եղավ Փոստանջյանի քաղաքական հեղինակության համար: Միջադեպից մի քանի ամիս անց արդեն Զարուհին անցել է գրոհի եւ բացահայտում է հեղափոխության «ֆեյքերին»: Առանց մեկնաբանելու այդ բացահայտումների բովանդակությունը, արձանագրենք, որ ժամանակին Փաշինյանը կամ, ավելի ճիշտ՝ նրա «թավշյա հեղափոխականները», չներեցին Զարուհուն՝ 2017-ին Նիկոլին մերժելու համար: Այսօր Զարուհին չի ներում Փաշինյանին՝ հրապարակավ իրեն մերժելու համար:
Նաիրա ՎԱՆՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում
