Մենք հետագայում էլ կշարունակենք Հայաստանը մեկուսացնել բոլոր տարածաշրջանային նախագծերից՝ դրա համար օգտագործելով բոլոր միջոցները, և կվերականգնենք մեր տարածքային ամբողջականությունը: Այս մասին հայտարարել է Ադրբեջանի նախագահ Իլհամ Ալիևը արվեստի ներկայացուցիչների հետ հանդիպմանը:
Ալիևը նշել է, որ Հայաստանի նոր ղեկավարությունը չպետք է կրկնի նախորդի սխալները և պետք է շուտափույթ կերպով բանակցությունների ճանապարհով դուրս բերի «օկուպացիոն ուժերը գրավյալ հողերից և հնարավորություն տա Ադրբեջանի քաղաքացիների վերադառնալ, հայրենի պատմական, հնագույն հողեր»:
«Որքան շուտ նրանք դա հասկանան, այնքան լավ՝ իրենց, տարածաշրջանի համար: Եվս մեկ անգամ ցանկանում եմ ասել, որ մենք չենք պատրաստվում հաշտվել նման իրավիճակի հետ»,- սպառնացել է Ալիևը:
Ալիևը հավելել է, որ կշարունակեն աճեցնել ռազմական հզորությունը և ձեռնարկել բոլոր անհրաժեշտ միջոցները «պատմական հողերն օկուպանտներից ազատագրելու» համար:
«Հույս ունեմ, որ Հայաստանի ղեկավարությունը, ճիշտ վերլուծելով տարածաշրջանում առաջ եկած իրավիճակը, շուտափույթ կերպով դուրս կբերի օկուպացիոն ուժերը մեր հողերից: Հակառակ դեպքում հնարավոր է ցանկացած տարբերակ, և մենք պատրաստ ենք ցանկացած տարբերակի»,- ասել է Ալիևը:
Վիկտորյա ԱՆԴՐԵԱՍՅԱՆ
