ԱԺ Գիտության, կրթության, մշակույթի, երիտասարդության եւ սպորտի հարցերի հանձնաժողովի այսօրվա նիստին անդրադարձ եղավ վճարովի համակարգում սովորող ուսանողների խնդրին եւ վարձը մաս-մաս վճարելուն:
ԿԳ փոխնախարար Հովհաննես Հովհաննիսյանը նշեց, որ բուհերի ռեկտորների հետ հարցը քննարկվել է: Նաեւ ասաց, որ եթե ուսանողները դիմել են իրենց, իրենք էլ բուհերին, բուհերն ընդառաջել են ուսման վարձը ամսական կտրվածքով վճարելու համար: Ինչ վերաբերվում է օրենքի նախագծում այդ նորմը ներմուծելուն, փոխնախարարն ասում է, որ որեւէ խնդիր չեն տեսնում, ուղղակի բուհերը որոշակի դժվարություններ կունենան հաշվապահության մասով:
Հանձնաժողովի նիստում հնչած կարծիքներում այն տեսակետն էր շեշտադրվում, որ վարձավճարի պատճառով ուսանողները չեն կարողանում գնալ բուհեր, մինչդեռ համապատասխան նախագծով լայն հնարավորություն է տրվում:
Հանձնաժողովը տվեց դրական եզրակացություն, որ նախագիծը եկող քառօրյայում դրվի ԱԺ օրակարգ: Եթե փոփոխությունն անցնի, ուսանողները հնարավորություն կունենան ուսման վարձը վճարել տարվա ընթացքում՝ մաս առ մաս:
Գոհար ՀԱԿՈԲՅԱՆ
