Աֆրիկյանների տունը միակ հուշարձան-շենքն է, որը քանդելուց հետո 100 տոկոսով կվերականգնվի: Այսօր Երեւանի քաղաքապետարանում տեղի ունեցած ասուլիսում ասաց Երեւանի գլխավոր ճարտարապետ Արթուր Մեսչյանը՝ պատասխանելով հարցին՝ ինչ է լինելու Նոր Երեւանի ճակատագիրը, արդյոք այն նոր քաղաքային իշխանության օրոք կյանքի՞ է կոչվելու:
Պարոն Մեսչյանն ասաց, որ Աֆրիկյանների տան քարերը պահպանված են՝ ի տարբերություն մյուս հուշարձան-շենքերի, որոնք բարբարոսաբար են քանդվել, ուստի շենքը կվերականգնվի՝շնորհիվ բարեխիղճ քարտաշների, որոնք խնամքով քանդել, համարակալել են քարերը: Իսկ մնացած շենք-հուշարձաններից մեծ մասի քարերը պահպանված չեն, եւ 30 տոկոսն է փրկված: Գլխավոր ճարտարապետի տվյալներով, Աֆրիկյանների շենքը կվերականգնվի 2-2,5 տարվա ընթացքում:
Հարցին, թե երբ կվերսկսի Երիտասարդական պալատի տեղում իրականացվելիք շինարարությունը, որն արդեն երկար տարիներ է՝ այդպես էլ չի իրագործվում, պարոն Մեսչյանն ասաց, որ այն բավականին թանկարժեք ծրագիր է եւ դեռ նախագծման, թույլտվություններ տալու ժամանակ հաշվի չի առնվել, որ այդպիսի ծրագրերը գրեթե անիրագործելի են:
Մանրամասները՝ տեսանյութում
Լուսինե ԲՈՒԴԱՂՅԱՆ
