«Հոգնել ենք սրճարանների քանակից, պետք է այսպիսի ազատ, կանաչ հարմարավետ այգիներ շատ լինեն մեր քաղաքում: Զբոսաշրջիկների համար,նույնպես, հետաքրքիր կլինի: Մեր երկիր այցելելիս գոնե մայրաքաղաքում էլ ինչ-որ բան կտեսնեն, ոչ թե միայն քաղաքից դուրս գնալիս»,-Aravot.am-ի հետ զրույցում ասաց Ջուլիա Մակունցը, որն այսօր ընտանիքով այցելել էր Մաշտոցի պողոտայում գտնվող նորակառույց այգին: Շուտով վերակառուցված այգին իր դռները կբացի մայրաքաղաքի բնակիչների եւ հյուրերի առաջ՝ բոլորովին նոր լուծումներով ու լուսային շատրվաններով:
Ջուլիա Մակունցի խոսքով,այսպիսի այգիները նախ՝ քաղաքն են գեղեցկացնում, իսկ որ ամենակարեւորն է երեխաների, մեծահասակների ժամանցը կազմակերպելու համար հարմարավետ պայմաններ են ապահովում:
Այգին վերակառուցվել է զրոյից, ամբողջությամբ պատված է գրանիտե սալիկներով, ողջ երկայնքով մեկ տեղադրվել են հարմարավետ նստարաններ:
Վերակառուցման աշխատանքներն իրականացվել են Տաշիր ընկերությունների խմբի ֆինանսավորմամբ:
Նորակառույց այգուն թարմություն են հաղորդում մոտ 90 մետր տարածք զբաղեցնող շատրվանները: Այգու տարածքը ամբողջությամբ լուսավորված է:
Այգու կողքով անտարբեր չէին անցնում նաեւ զբոսաշրջիկները:
Արտերկրից ժամանած Ալեքսանդր Սպիցը ընկերների հետ լուսանկարվեց, ապա ասաց, որ այն շատ հարմարավետ է, շատրվաններն էլ՝ հետաքրքիր լուծումներով.«Կարծում եմ գիշերն էլ այստեղ շատ գեղեցիկ կլինի: Այդ պատճառով գիշերն էլ կգանք»:
Լուսինե ԲՈՒԴԱՂՅԱՆ
