Այսօր՝ նոյեմբերի 2-ին, Ալավերդու «Էյ Սի Փի» ընկերություն են այցելել ՀՀ վարչապետի պաշտոնակատարի օգնական Արեն Մկրտչյանը, փոխվարչապետի պաշտոնակատարի գրասենյակի ղեկավար Վարագ Սիսեռյանն ու Լոռու մարզպետ Անդրեյ Ղուկասյանը: Նրանք հանդիպել են ընկերության ղեկավարներ Լուսինե Մեջլումյանին ու Նիկոլայ Ֆեոֆանովին: Հանդիպման ընթացքում խոսվել է գործարանի պատմության ու Ալավերդու համար դրա կարևոր դերի, նշանակության մասին: Անդրադառնալով պղնձաձուլական գործարանի աշխատանքների հարկադիր դադարին՝ Վարագ Սիսեռյանը նշել է, որ կառավարությունն ամեն բան անելու է, որպեսզի այս պղնձաձուլարանը ժամանակավորապես վերաբացվի, և գործարանի 630 աշխատակիցները շարունակեն աշխատել։
Դրանից բացի, այդ ժամանակահատվածում փոխվարչապետի կողմից ստեղծված աշխատանքային խմբի շրջանակներում կշարունակվի կառավարության աջակցությունը «Արմենիան Քափըր Փրոգրամ» ՓԲԸ-ին՝ նոր պղնձաձուլարանի կառուցման ծրագիրը կյանքի կոչելու համար:
«Մեր աշխատանքային խմբի նպատակն այն է, որ այդ ծրագիրը իրականանա: Հինը փակելով, նորը բացելով նաև նոր աշխատատեղեր կավելանան, արտանետումները կտրուկ կնվազեն: Սա շատ կարևոր է: Մեր աշխատանքային խումբը շարունակում է աշխատել այս ուղղությամբ և հաջորդ շաբաթ ևս այս հարցի շուրջ հանդիպում կունենանք»,-ասել է Վ: Սիսեռյանը:
Կառավարության ներկայացուցիչներն անդրադարձել են այն հանգամանքին նաև, որ գործարանի՝ 600-ից ավելի աշխատակիցների իրավունքների համար միայն չի կարելի անտեսել քաղաքի ողջ բնակչությանը: Վարագ Սիսեռյանը նշել է նաև, որ կառավարությունը բանակցում է տարբեր ներդրողների հետ, որպեսզի Ալավերդիում արտադրության այլընտրանքային ճյուղեր նույնպես լինեն: «Էյ Սի Փի» ընկերության ղեկավարների հետ առանձնազրույցից հետո կառավարության ներկայացուցիչները հանդիպել են նաև ընկերության աշխատակիցների հետ, այնուհետև այցելել Ալավերդու համայնքապետարան: Համայնքապետարանում քննարկվել են սոցիալական այն բոլոր ծրագրերը, որոնք տարիներ առաջ իրականացվել են գործարանի կողմից ու հիմա դադարեցված են: Ալավերդի համայնքի ղեկավարի տեղակալ Արթուր Վարոսյանն ասել է, որ պղնձաձուլարանի աշխատանքը վերսկսելու պարագայում պետք է այնպես անել, որպեսզի այդ ծրագրերը վերականգնվեն: Քննարկվել են նաև քաղաքի զարգացմանը, մասնավորապես զբոսաշրջության ոլորտին վերաբերող հարցեր:
