«Հասարակություն, Արդարություն, Իրավունք» իրավապաշտպան հասարակական կազմակերպության նախագահ Լուսինե Զեյնալյանի դիտարկմամբ, համաներման նախագիծը շատ վաղուց է մշակվել, պարզապես այսօրվա Հայաստանում այն թրծվել է:
«Նախկին համաներումները տարածվեցին շահառուների 20 տոկոսի, այսօր տարածվում է 70 տոկոսի վրա: Համաներումը գաղտնի ակտ պետք է լիներ,այն նախագիծը, որ հրապարակվեց համացանցում, չպետք է հասանելի լիներ, բայց առաջինը հենց կալանքի տակ գտնվողներին հասանելի եղավ: Կարծում եմ՝ այն կազմելիս փաստաբանների կարծիքները պետք է հաշվի առնեին, ինչը չարվեց, որով հետեւ մենք՝ փաստաբաններս ենք ուսումնասիրում, աշխատում կալանքի տակ գտնվող անձանց հետ: Բացի այդ մի խնդիր կա, որ բոլոր համաներումներում նշվում է երեք տարվա շեմը, նախադեպ կլիներ, որ գոնե մեկ տարի ավելացնեին, որովհետեւ կոռուպցիոն ռիսկը շատանում է, օրինակ՝ դատարանը կարող է կաշառք վերցնելով 3 տարի ու մի քանի ամիս պատիժ սահմանել, որ համաներման տակ ընկնեն» ,- այսօր «Նոյան տապան» ակումբում ասաց Լուսինե Զեյնալյանը:
Անդրադառնալով գործարար Սամվել Մայրապետյանի՝ կալանքի տակ գտնվելուն՝ նա ասաց, որ Հայաստանում կաշառքի վերաբերյալ կան կարծրատիպեր, կաշառքը խիստ պատիժ են համարում, բայց կալանքը պետք է գնահատվի ծայրահեղ դեպքերում, երբ հիմնավորվի, որ կարող է կատարվել մեկ այլ նմանատիպ արարք. «Չեմ կարծում, որ պաշտոնյան փորձի կատարել նմանատիպ այլ հանցանք, եթե արդեն ունի նմանատիպ խնդիր օրենքի հետ… այս դեպքը մարդու իրավունքների կոպիտ խախտման օրինակ է: Բոլորն էլ գիտեն, որ հին Հայաստանում բոլոր պաշտոնյաների 90 տոկոսը նույն ռեժիմով են աշխատել, վերադասն է բերել դրան, հիմա փորձում են կոռուպցիայի դեմ պայքարել, բայց զիջումներ էլ պետք է լինեն» :
Արփինե ՍԻՄՈՆՅԱՆ
