Իրավապաշտպան Արթուր Սաքունցի դիտարկմամբ, 2007-2011 թվականներին ՀՀ հատուկ քննչական ծառայության հատկապես կարևոր գործերի ավագ քննիչի պաշտոնը զբաղեցնող Վահագն Հարությունյանը, որին մեղադրանք է առաջադրվել իր վարույթում առանձնապես ծանր հանցագործությունների վերաբերյալ քննվող քրեական գործով նախաքննության ընթացքում քննչական խմբի կազմում ընդգրկված առանձին քննիչների հետ և ոստիկանության ծառայողների, այդ թվում` փորձագետ Ա. Հ.-ի օժանդակությամբ միասնական դիտավորությամբ ապացույցներ կեղծելը կազմակերպելը, կատարել է 2-րդ նախագահ Ռոբերտ Քոչարյանի հրահանգը:
«Քոչարյանի ղեկավարած տարիները բոլորը գնահատում են միակենտրոն ղեկավարում: Ով կարող էր համարձակվել որեւէ որոշում կամ գործողություն կատարել առանց Ռոբերտ Քոչարյանի հրահանգի, ով կարող էր սեփական նախաձեռնությամբ նման բան անել, ով է այդ արջի ծառայություն մատուցողը: Վահագն Հարությունյանը պարզապես որպես ամենագերազանցիկ աշակերտ կամ Հռոմի պապից ավելի կաթոլիկ երեւալու հակում ունեցող անձնավորություն է, որն անվերապահորեն կատարել է բոլոր հրահանգները, թե չէ ինքը հո անգրագետ չէ, չի՞ հասկանում, որ կեղծել է ու դա միայն հրահանգով կարող էր անել»,- ասաց Արթուր Սաքունցը:
Ըստ նրա՝ հենց սկզբից էլ ակնհայտ էր, որ Մարտի 1-ի գործով կեղծված է ամբողջ քրեական գործի տրամաբանությունը. «Վահագն Հարությունյանին առաջադրված մեղադրանքը Ռոբերտ Քոչարյանի նկատմամբ առաջադրված մեղադրանքի համար ապացույցներից մեկը կարող է լինել: Քոչարյանի նախագահության ժամանակ բոլոր փաստերը՝ թե 2003, թե 2004, թե 2005 թվականների խայտառակ սահմանադրական հանրաքվեի արդյունքների կեղծմամբ, թե 2008-ի մարտի մեկով, թե կոռուպցիոն բազմաթիվ հանցագործություններով բոլոր փաստերը հանդիսանում են Քոչարյանի՝ որպես միակ տղամարդու հավակնություն ունեցող անձի դեմ մեղադրանքի ապացույց»:
Արփինե ՍԻՄՈՆՅԱՆ
