«Մայրապետյանն էլ, ես էլ նույն մեղադրանքով ենք գնացել, բայց ես խոսել եմ, նա չի խոսել», -«Հայացք» մամուլի ակումբում լրագրողների հետ հանդիպմանը հայտարարեց գործարար Սիլվա Համբարձումյանը:
Նա նշեց՝ թող Մայրապետյանն էլ խոսեր, դառնար որպես վկա:
Սիլվա Համբարձումյանը պատմեց՝ նույն հիմքով երկուսին էլ կանչել են. «2008-ի փետրվարի 26-ից մինչև մարտ 31-ը ունեմ կանխիկացում՝ 14 միլիոն դոլար, ութ հարյուր միլիոն դրամ և փոխանցում: Երբ մարտի 1-ի գործով սկսել են հետաքրքրվել՝ ովքեր են կանխիկացրել, ես դրա համար եմ կանչվել: Ինձ կանչել, հարցրել են, ես ասացի՝ վեց միլիոնը Արամ Հարությունյանի համար եմ արել: Հարցին՝ մնացա՞ծն ինչ եք արել. Մայրապետյան Սամվելին ինչո՞ւ եք երկու միլիոն դոլար փոխանցել, այդ ժամանակ ես 12.00-ից մինչև 18.00 մտածեցի՝ հայտարարություն տա՞մ, թե՞ ոչ: Եթե չտայի, ես էլ հիմա ուրիշ տեղ կլինեի: Մտածեցի՝ ինչո՞ւ չասել. հայտարարություն տվեցի, որ, այո, 2008-ին խոշոր գործարքներ եմ արել արաբների հետ և ինձ չխանգարելու համար ես վճարել եմ ՀՀ նախագահին՝ Քոչարյանին, ՀՀ վարչապետին՝ Սերժ Սարգսյանին և Արմեն Գևորգյանին: Իսկ Մայրապետյան Սամվելի հետ ոչ տալիք ունեմ, ոչ առնելիք: Ես Մայրապետյանի հետ խնդիր չունեմ. առերեսվել ենք, ասել ենք՝ ճանաչում ենք իրար, նորմալ հարաբերությունների մեջ ենք: Ինքը ոչինչ չհայտարարեց, թե ինչի համար է գումար փոխանցվել, ասաց փոխանցում եղել է, բայց չեմ հիշում՝ ինչի համար է այդ գումարը փոխանցվել:
Ցանկացած խոշոր գործարք անելիս և՛ վարչապետին, և՛ ՀՀ նախագահին պետք էր գումար փոխանցել»:
Aravot.am-ի հարցին հիմա՞ էլ է այդպես, Սիլվա Համբարձումյանը պատասխանեց. «Չեմ կարծում, որ Փաշինյանի օրոք նման բան լինի»:
Լրագրողների հարցին՝ ինչո՞ւ Մայրապետյանը չի խոսել, Սիլվա Համբարձումյանն արձագանքեց. «Սամվել Մայրապետյանն ո՞ւմ միջոցով է հարստացել, ո՞նց կխոսի: Խոսելուց հետո նա այլ կարգավիճակ կստանար»:
Տաթև ՀԱՐՈՒԹՅՈՒՆՅԱՆ
