Վերականգնվել է Տավուշի մարզի Արճիս համայնքը Մ-6 միջպետական ճանապարհի միջոցով տարածաշրջանի այլ բնակավայրերի հետ կապող մոտ 3,67 կիլոմետրանոց ճանապարհահատվածը։
Հիմնանորոգումն արվել է Կենսական նշանակության ճանապարհային ցանցի բարելավում ծրագրի լրացուցիչ ֆինանսավորում ծրագրի շրջանակներում։
ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը եղել է Արճիսում, անձամբ ծանոթացել կատարված շինարարության որակին։
Նախարարի պաշտոնակատարի հրամանով ստեղծված ավարտված շինարարական օբյեկտը շահագործման ընդունող հանձնաժողովի անդամները ևս այցելել են Արճիս և ուսումնասիրել կատարված աշխատանքները։
1985թ.-ից ի վեր այս ճանապարհը չէր նորոգվել։ Այս տարվա մարտին մեկնարկած շինաշխատանքներն ավարտվեցին նախատեսվածից 2 ամիս շուտ։ Արճիսն ունի 1200 բնակիչ, որոնք զբաղվում են գյուղատնտեսությամբ: Որակյալ ճանապարհները նպաստավոր պայման են նաև գյուղատնտեսական մթերքը տեղափոխելու և իրացնելու համար։
Շինարարությունն իրականացրած «Կապավոր» ընկերության ղեկավար Արման Հակոբջանյանը Հակոբ Արշակյանին ներկայացրեց կատարված աշխատանքի մանրամասները։
Վերականգնվել են հողային պաստառը, ճանապարհային պատվածքը, ջրահեռացման համակարգը, կառուցվել են կողնակներ, նորոգվել է ջրագիծը, տեղադրվել են ճանապարհային նշաններ և անվտանգության այլ էլեմենտներ, իրականացվել են մայթերի, իջատեղերի և մուտքերի կառուցման աշխատանքներ։
ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայություն
