Երևանի ընդհանուր իրավասության դատարանը բավարարել է «Մարտի 1-ի» գործով քննչական նախկին խմբի ղեկավար Վահագն Հարությունյանին կալանավորելու մասին քննչական մարմնի միջնորդությունը:
Aravot.am-ին հետ զրույցում Վահագն Հարությունյանի փաստաբան Միհրան Պողոսյանը դժգոհություն հայտնեց՝ դեռ որոշումը չեն ստացել. «Ըստ դատարանի որոշման՝ Վահագն Հարությունյանը պետք է կալանավորվի, սակայն որոշումը դեռ չենք ստացել, ու ոչ ոք դեռևս ՀՀ-ում չի տիրապետում այդ որոշմանը: Մինչդեռ ըստ օրենքի՝ արդեն հրապարակումից անմիջապես հետո պիտի տրամադրվի որոշումը»:
Միհրան Պողոսյանը տեղեկացրեց՝ պարտադիր բողոքարկելու են որոշումը Վերաքննիչ դատարան: Նա տեղեկացրեց, որ Վահագն Հարությունյանը բուժման նպատակով այս պահին գտնվում է ՌԴ Մոսկվա քաղաքում:
Հիշեցնենք՝ ՀՔԾ-ն հայտնել էր, որ 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ քրեական գործի նախաքննության ընթացքում պարզվել է, որ Վ. Հ.-ն, 2007-2011 թվականներին զբաղեցնելով ՀՀ հատուկ քննչական ծառայության հատկապես կարևոր գործերի ավագ քննիչի պաշտոնը, իր վարույթում առանձնապես ծանր հանցագործությունների վերաբերյալ քննվող քրեական գործով նախաքննության ընթացքում կազմակերպել է քննչական խմբի կազմում ընդգրկված առանձին քննիչների և ոստիկանության ծառայողների հետ, այդ թվում՝ փորձագետ Ա. Հ.-ի օժանդակությամբ միասնական դիտավորությամբ ապացույցներ կեղծելը:
Տաթև ՀԱՐՈՒԹՅՈՒՆՅԱՆ
